A primeira edición do salón coincidirá coa clásica popular pedestre de San MartiñoA cita convértese no escaparate das federacións e clubes deportivos da comunidade a través de presentacións, exhibicións, adestramentos, campionatos e obradoirosSPORTUR GALICIA
16 nov 2017 . Actualizado a las 17:22 h.Comeza mañá en Expourense a primeira edición de Sportur Galicia, Salón do Deporte e Turismo Activo que ata o domingo 19 de novembro ten o obxectivo de dar a coñecer Galicia como destino activo e saudable e promocionar a multitude de opcións que esta comunidade ofrece para os afeccionados ao deporte e ás actividades ó aire libre animando ao mesmo tempo aos propios galegos a practicalas.
Esta cita ofrece 10.000 metros cadrados cubertos para practicar deportes coñecidos e gozar, aprender e descubrir outros novos. Máis de 100 actividades para converter a Sportur Galicia na mellor cita de fin de semana para os deportistas profesionais e afeccionados e tamén para as familias. Expourense convértese durante tres días nun gran parque multiaventura para todas as idades no que practicar: Escalada co rocódromo; bautismo con ponis; ponte tibetana; tandas de remo indoor achegadas polo Cerlac; simuladores de kayak e canoa; práctica de squash; xogos tradicionais; simulador de tiro virtual; simuladores de navegación a vela; adopción de hábitos de vida saudables e máis. Tamén se poderá practicar ciclismo (infantil e rutas en bici de estrada e BTT fóra do recinto); tiro con arco; bádminton; marcha nórdica; petanca; voleibol; ximnasia rítmica; esgrima antiga; xadrez; fitness; pilates e zumba; roller derby e bodyjump entre outras.
Ademais, poderase gozar coas exhibicións, torneos e adestramentos de deportes como o wushu; baloncesto adaptado a cadeira de rodas; halterofilia; pentatlón moderno ou hockey. Xunto a eles haberá obradoiros vencellados coa nutrición ou outros de realización de nós mariñeiros ou as presentacións do Campus con Vida da Universidade de Vigo-Campus de Ourense, ademais das degustacións de produtos autóctonos no expositor de Porto e Norte. O programa completo con día e hora pode consultarse na web www.sporturgalicia.com.
Organizado por Expourense co apoio principal da Xunta de Galicia a través da Axencia de Turismo de Galicia e da Secretaría Xeral para o Deporte, Sportur coincide coa presenza na cidade de Ourense de milleiros de deportistas que participarán na Carreira Popular de San Martiño e que terán a opción de recoller os seus dorsais no propio recinto feiral. Aqueles que vaian participar nesta proba poden achegarse ata o stand de Coca-Cola e converter a súa paixón polo deporte en litros de solidariedade, xa que esta empresa contará cunha cinta que traducirá os quilómetros que se corran nela en litros de auga e refrescos que serán doados a Cáritas.
Sportur Galicia será un evento único que conxugue turismo e deporte con educación e coa adopción de hábitos saudables que poidan mellorar a nosa calidade de vida. A finalidade é ofrecer novas opcións e equipamentos aos que practican deporte e animar aos demais a que o fagan. Para conseguir isto, o salón conta cun completo programa que supera amplamente o cento de actividades. O salón conta con 121 expositores, 32 dos cales son federacións, asociación e clubs deportivos que realizarán exhibicións, campionatos e obradoiros. De paso, acolle a entrega de medallas do circuito «Correndo por Ourense» do Concello local. Será o sábado, ás 18.00 horas.
O salón recibirá ademais a visita de importantes representantes dos deportes como a do presidente do Comité Olímpico Español, Alejandro Blanco; as xogadoras do Enviala, campioas de España de Fútbol Sala; do Monbús Obradoiro CAB; dos xogadores do Ourense CF e dos da Unión Deportiva Ourense. Participan do mesmo xeito empresas especializadas en equipamento deportivo e diferentes destinos turísticos que coñecer despois a practicar deporte. Para participar de toda esta oferta, a entrada é gratis e o programa. pode seguirse en www.sporturgalicia.com e nos seus perfís en Facebook e Twitter.