O OUFF terá ciclos de Mariano Llinás, Marilia Rocha e Jeannette Muñoz
OURENSE CIUDAD
O festival aposta por dar continuidade aos seus «focos» sobre os realizadores
12 sep 2017 . Actualizado a las 05:00 h.O Festival de Cine Internacional de Ourense (OUFF) abría unha nova etapa o pasado ano, coa incorporación de Fran Gayo como responsábel da dirección do certame, e daquela poñía en marcha unha iniciativa -a sección de «focos»- que tiña como obxectivo facer retrospectivas sobre o traballo de realizadores. Tanto no caso de directores cunha ampla traxectoria como no de xente de menor percorrido profesional, máis cunha obra merecente de formar parte desta nova sección.
Dende a organización do OUFF adiantouse onte que Mariano Llinás, Marilia Rocha e Jeannette Muñoz serán os protagonistas das retrospectivas que se incluirán na programación do festival deste ano.
Llinás viaxará a Ourense
O certame, que se celebrará do 20 ao 27 de outubro, aposta con estes ciclos «por dar a coñecer a riqueza e diversidade das cinematografías iberoamericanas, trazando un mapa histórico fílmico que contempla unha perspectiva de xénero e unha mirada que traspasa as fronteiras do mercado». Na obra do arxentino Mariano Llinás, segundo se lembra dende o festival, conviven ficción e realidade, fotos, imaxes de arquivo -reais ou manipuladas-, literatura escrita, oral ou en imaxes: «O
relato total
de Mariano Llinás é dunha radicalidade realmente sinxela.
Balnearios
,
La más bella niña
,
Historias extraordinarias
ou os seus guións xunto a Santiago Mitre (
Paulina e A Cordilleira
, que chegará á carteleira nas próximas semanas) envólvennos nun bulebule de ideas -fondas, insólitas, sempre enxeñosas- coa emoción e o pulso do relato popular (o thriller, o western, a comedia, a intriga...)». Ten participado en festivais por todo o mundo e estará en Ourense na súa retrospectiva, e para presentar a primeira parte de
La flor
.
Memoria e cine experimental
O foco de Marilia Rocha incluirá as catro longametraxes da realizadora brasileira. A directora incide co seu traballo na memoria histórica, a través de lembranzas, imaxes e relatos persoais dalgunhas das comunidades brasileiras esquecidas «polos dispositivos cinematográficos». No caso da chilena Jeannette Muñoz a súa canle de expresión pasa polos 16 mm. e o cine experimental. Destaca no seu traballo a serie
Envíos
, colección de cartas fílmicas sen retorno coas que reflexiona sobre a súa experiencia.