«A mostra céntrase no litoral e nos espazos vividos polo home»

O profesor e fotógrafo abre en Marisa Marimón a súa exposición «Perimetrada»


Na galería Marisa Marimón ábrese esta tarde ao público (20.00 horas) unha nova mostra do programa do Outono Fotográfico. Manuel Sendón (A Coruña, 1951) é un dos referentes da historia da fotografía en Galicia. Promotor, xunto con Xosé Luis Suárez Canal, da desaparecida Fotobienal de Vigo, é profesor da Facultade de Belas Artes de Vigo. Sendón e Suárez Canal dirixen o Centro de Estudos Fotográficos da Universidade de Vigo e os seus últimos proxectos, o dos «Espantallos» e «Mil Ríos», xa pasaron polo Outono Fotográfico.

-«Perimetrada» mantén a filosofía de «Mil Ríos»?

-Naquel proxecto o que fixemos Fran Herbello e máis eu foi remontar en piragua os ríos para documentar a paisaxe. Nesta nova proposta o obxectivo fixado era percorrer a costa tan próximo ao mar como fose posíbel. Fíxen a andaina en 2014 e 2015 e nas 31 etapas percorrín uns 1.500 quilómetros, en bici e tamén a pé cando non había outra forma de facelo.

-Desta volta cal foi o obxectivo do proxecto?

-En todas as imaxes da exposición -logo tamén hai un panel con 36 fotografías que se refiren aos camiños percorridos e a perimetrada realizada- está presente o mar. Mais non me interesa como obxecto de beleza, senón como espazo vivido polo home. En todas hai algún elemento que fala ou que dá conta da transformación que o home foi facendo polo litoral. Son sinais que fan referencia á vida do home neste espazo e á súa intervención no mesmo. En conxunto, «Perimetrada» céntrase no litoral e nos espazos vividos polo home.

-Atopouse con problemas para o achegamento ao mar dende terra?

-Si. Hai zonas nas que a presión urbanística e o territorio ocupado son moi fortes, sobre todo nas Rías Baixas, e tamén de xeito destacado na zona de Lugo. Na Costa da Morte e en Fisterra, que é o que máis coñezo porque teño casa neste pobo, o litoral está moito mellor conservado. Non quere dicir que non haxa casos desa presión ou desa ocupación do territorio da que falo. Pero é menos. E logo xa están outros aspectos como os camiños que xa non se poden percorrer ou outros atrancos que te desvían da desexada proximidade ao mar.

-O traballo desenvolveuno nos dous últimos anos?

-O proxecto de «Perimetradas» fíxeno, no que ao percorrido antes sinalado se refire, neses dous anos. Pero non é algo pechado. De feito en Ourense alguna das fotos fíxose con posterioridade.

Conoce nuestra newsletter con toda la actualidad de Ourense

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
0 votos
Comentarios

«A mostra céntrase no litoral e nos espazos vividos polo home»