Kin García Trío actúa mañana no Café Latino no maco do Ciclo 1906 Jazz
01 nov 2016 . Actualizado a las 05:00 h.O Ciclo 1906 Jazz voltará de novo a Ourense mañá, co concerto do Kin García Trío no Café Latino (22.30 horas. 10 euros). O músico de Noia estará acompañado por Jacobo de Miguel (piano) e Noli Torres (batería). O contrabaixista compaxina a súa faceta como concertista coa de compositor e docente.
-¿Xa ten actuado no Latino?
-Non, vai ser a miña primeira vez. Si teño acudido ao café, mais como espectador dalgúns dos concertos.
-¿E en Ourense?
-Na cidade en moitas ocasións. Debo ter tocado en Ourense como medio cento de veces. Cando levas tanto tempo adicado á música e vencellado a diferentes formacións é algo normal.
-¿Con que se van atopar os espectadores?
-Cunha sesión de música bastante íntima, con jazz europeo a base de moito contrapunto, fuga e cousas polo estilo. A «world-music». É dicir, escapando un pouco do swing e de toda esa historia máis vencellada ao que se identifica co estilo americano. Son oito composicións autobiográficas.
-¿En que se basan?
-Fan referencia aos espazos e ás paisaxes vencelladas á miña vida: os lugares onde xogabamos de nenos, o vello estaleiro de Ribeira, as calas onde xogabamos, os topónimos e cousas polo estilo.
-Mantén a formación.
-Levamos dez anos co trío. Jacobo e Noli foron alumnos meus, cando empezamos vimos que conectabamos moi ben e dende entón seguimos.
-¿Traballa nalgún proxecto?
-Este ano saiu «Xingra como a area» e o 18 sae un libro-cedé con Talabarte.