Alfonso Medela actúa esta noite, ás 23.00 horas, no Café Latino xunto a Wilfred Wild
10 mar 2016 . Actualizado a las 05:00 h.Ao Café Latino de Ourense volta esta noite o pianista Alfonso Medela (O Carballiño, 1974). Unha cita semanal que se mantén dende hai dous anos -os xoves actúa no Latino e os sábados no Carballiño (Don Paco)- e que complementa con actuacións por toda Galicia. Locais en Pontevedra, Compostela e outras cidades son tamén lugares aos que acude regularmente a dar concertos. Iniciouse no piano no Conservatorio do Carballiño, donde agora é profesor, e logo completou estudos en Santiago, Madrid e Barcelona. Ao longo de todos estes anos conseguiu varios premios e becas e foi profesor da Escuela de Música Creativa de Madrid (ESMUC).
-¿Contar cunha cita semanal non condiciona o traballo?
-Non. Ao contrario, esíxeche máis e convírtese nun verdadeiro estímulo. Cambiamos o repertorio todas as semanas e iso fai que teñas que traballalo moito. E cada quince días temos artista invitado, co cal tes que crear un repertorio adaptado para esa persoa. Está semana temos a Wilfred Wild.
-¿Valárase o esforzo?
-É algo que notas e que che dá unha satisfacción especial. Xeralmente o Latino está cheo e ves moita xente que repite, semana a semana ou con moita frecuencia, e iso quere dicir que lle gusta á xente. E vemos que hai persoas de Vigo ou doutras cidades que fan eses cen quilómetros para acudir ao concerto. Iso quere dicir algo.
-Tocou con importantes músicos e grupos. ¿Que o levou a voltar ao Carbaliño?
-Botei sete anos en Madrid e catro en Barcelona. É certo que hai moitas máis oportunidades e posibilidades de facer cousas, aínda que tamén é certo que na maior parte das veces son proxectos en precario, sen tempo para preparalos ou ensaiar e todo feito ás presas. Aquí tes outro ritmo, podes adicarlle o tempo que requiren as cousas para facelo ben, tes outra calidade de vida e o traballo ten outra consideración.
-¿Cantos anos leva de profesor no conservatorio?
-Non levo a conta con precisión pero por aí uns vinte.
-¿De Rock & Juana ao jazz?
-Son etapas que vas cubrindo na túa vida. Vas escoitando cousas e iso faite evolucionar. Da mesma maneira que me acheguei ao jazz latino polo seu sabor e actualmente xa me centro no jazz.
-¿Por que edita tan pouco?
-Agora vai sair o meu terceiro disco, e participei noutros dous colectivos. Todo vai surxindo e non me atopo a gusto gravando, sinto que perdo a naturalidade e a frescura. Prefiro o directo, aí é onde me atopo ben e disfruto.
-¿E un disco en directo?
-Esa é a meta, mais creo que non antes de dous anos.
-¿Ten algún outro proxecto?
-Vou iniciar unha xira de concertos cun quinteto. Entre outros participa o cantante portugués Manuel Linhares.