«É a mascarada máis grande da Península»

Máis de 800 persoas de 39 grupos de España e Portugal participan no desfile de entroido desta tarde en Viana e mañá en Vilariño


A un veciño de Viana do Bolo ou Vilariño de Conso non se lle pode preguntar canto leva saíndo no entroido. Ou si, basta con pedirlle a data de nacemento. «Os que somos de aquí nacemos con isto, non é algo que se compre», di Jorge Domínguez (1974, Punxeiro, Viana). Desde hai catro anos organiza a mascarada ibérica, que hoxe (16.30 horas) desfile por Viana do Bolo, e mañá (ás doce) por Vilariño de Conso. Conta coa axuda da asociación Xuntos polo folión de Vilariño e os dous concellos. É tamén presidente da asociación de folións rurais vianesa, que agrupa a 11 pobos.

-¿Por que unha mascarada?

-Tiñamos invitación para ir á mascarada do festival de Lisboa, e ao participar fomos coñecendo entroidos e mascaradas da Península, empezamos a facer intercambios culturais, que eles veñen aquí e nós imos a Cantabria, Asturias, Cobres... E entón a idea foi, ¿por que non facer algo paralelo a Lisboa? Aquel é un desfile moi urbanita, moi de cidade, e pensei que se estaba quitando do contexto, porque os entroidos son do rural.

-¿E saiulles ben?

-Esta é a cuarta edición, e xa é o desfile de entroido máis grande da península. Alí había 31 grupos, e nós somos 39, e desfilamos unhas 800 persoas.

-¿Que se vai poder ver hoxe á tarde e mañá á mañá?

-É un desfile onde os folións van acompañados de máscaras de inverno de Portugal, Cantabria e outros puntos da península, e moitos de Ourense. Veñen de Manzaneda, A Gudiña, O Bolo, Verín, Xinzo... Para ter viva a nosa tradición, as máscaras van interacturar co público presente. O bo desde tipo de desfiles é que dentro da mesma poboación imos ver moitos entroidos que doutra maneira non se poderían ver, porque o día grande coincide en moitos sitios na mesma data.

-¿Por que decidiron xuntarse con Vilariño?

-O primeiro ano a idea era facelo só en Viana, pero desde fai anos tiña ilusión de poder ver o folión de Viana en Vilariño e ao revés. Parecía que chegaba o entroido e estaban separado os dous concellos [o seu día grande coincide no domingo]. Falei coa xente nova de Vilariño, e aceptaron, e están superintegrados na idea. A verdade é que teño moito apoio deles na organización.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

«É a mascarada máis grande da Península»