Luz Gabás, Rosario Raro, Pedro Feijoo e Juan Miguel Zunzunegui, entre outros, citaranse no parador para participar nun ciclo de conferencias
15 may 2026 . Actualizado a las 05:00 h.O Parador de Monterrei converterase os próximos días 22 e 23 de maio no escenario dun ambicioso encontro intelectual coa celebración da primeira edición do Ciclo de Conferencias Monterrei Literatura e Historia. Esta iniciativa foi presentada por José Luís Suárez, alcalde de Monterrei, e Miguel Losada, antropólogo e director do ciclo; acompañados por Marcos Vázquez, director da área de Cultura da Deputación. Os tres destacaron a importancia de converter este enclave nun foro de referencia para a divulgación.
Segundo explicou Losada, este evento nace do esforzo unido á sensibilidade pola cultura galega, sinalando que é difícil imaxinar un lugar mellor para unha cita desta magnitude, xa que en Monterrei naceu a imprenta en Galicia e o castelo chegou a actuar de facto como unha universidade con centos de alumnos entre os séculos XIV e XVI. «Monterrei é o escenario perfecto para unha iniciativa destas características. Estamos a falar dun lugar cun enorme valor patrimonial, onde a historia forma parte da propia paisaxe. Por iso, acoller aquí un encontro que une literatura e historia non só ten sentido, senón que reforza a nosa identidade como territorio», sinalou o alcalde.
O programa contará coa participación de autores de primeiro nivel como Luz Gabás, gañadora do Premio Planeta 2022; Rosario Raro, do Azorín 2024; Pedro Feijoo, Xerais 2024; Juan Miguel Zunzunegui, Hispanidad 2024; e os prestixiosos historiadores José Calvo Poyato e José Luis Corral. A xornada do venres 22 comezará coa intervencións de Calvo Poyato sobre a «Leyenda Negra» e de Corral sobre a transición dos Trastámara aos Austrias, seguidas dun coloquio con Luz Gabás arredor de «Corazón de Oro». O sábado, Rosario Raro analizará a figura do negrero filántropo, Pedro Feijoo presentará a súa última obra e Zunzunegui pechará as conferencias falando sobre a conquista. Ambas xornadas, que son de entrada libre e gratuíta para todo o público, incluirán sesións de sinatura de libros e unha experiencia enogastronómica cunha degustación de viños da Denominación de Orixe Monterrei.