Ourense: «Queda moito material musical que recuperar na emigración»

Día 11 • 20.30 horas • Teatro Principal • De 6 a 10 euros • Óscar Ibáñez vive estes días na estrada entre Pontevedra e Ourense. O sábado estará no Principal dentro do programa de concertos que está a desenvolver o seu proxecto Óscar Ibáñez & Tribo, aínda que a convocatoria vai moito máis alá e para a cita ourensá o formato vai ser o dun espectáculo de preto de dúas horas de duración que contará coa participación dun cento de artistas. Onte voltaba á cidade para ultimar a organización da montaxe.

-Como xurdiu o proxecto?

-Dende Ourense amosaron interese polo meu espectáculo, o de presentación do disco Alén do mar, e como colaboro dende hai moitos anos con varias formacións e grupos ourensáns e teño unha estreita relación con eles decidimos facer unha montaxe a pé feito. O espectáculo do sábado foi creado expresamente para Ourense.

-Na presentación vencellou o seu disco ás músicas das dúas beiras do océano e á influenza entre as mesmas.

-Alén do mar e un traballo inspirado no poema O fillo de Celt, de Ramón Cabanillas, e nas músicas de ida e volta. Daquela é unha viaxe sonora polo Atlántico na que se mesturan orixinalidade, imaxinación e creatividade. O camiño faise a base dunha selección de melodías galegas e latinoamericanas enriquecidas con elementos propios da música celta.

-Vostede xa editou no seu día un traballo de recuperación da memoria musical coa Deputación de Ourense. Ese material formará parte desta montaxe?

-Na gran festa que imos facer o sábado no Principal incorporamos novos temas ao repertorio que están vencellados con artistas ourensáns. Escoitaranse pezas de Juan Míguez -O Gaiteiro de Ventosela-, Os Trinta de Trives, Faustino Santalices ou O Quinteto Monterrey, a formación que creou José Posada en Cuba. O legado do Quinteto Monterrey foi o que recuperamos nunha das miñas viaxes a Cuba para dar clases de gaita. Levaba medio século custodiado pola familia e foi un proxecto máxico recuperar ese material.

-Queda traballo por facer nese legado vencellado á emigración?

-Moito. Pode parecer que non mais queda moito material musical por recuperar na emigración. As máis das veces nen as mesmas sociedades saben que o teñen, porque xa pasou moito tempo e as novas directivas non gardan memoria diso. Eu localicei gravacións en discos de pizarra no faiado do Centro Gallego de Buenos Aires.

-Quen participa no concerto?

-Xunto a Óscar Ibáñez & Tribo estarán a Real Banda de Gaitas, a Coral de Ruada, a Banda de Gaitas da Carballeira, Queixumes dos Pinos, o cantautor Emilio Rúa, o gaiteiro Marco Foxo, José Luis Tielas (clarinete), Óscar López (trompeta) e os profesores de bailes latinos Elena Marina e Nelson de Castro.