En Allariz, a Pasarela Solidaria celebrada no Hotel Oca Vila reuniu 3.458 euros
07 jun 2025 . Actualizado a las 05:00 h.A asociación sociocultural As Rebuldeiras de Cenlle fixo entrega dun cheque por valor de 1.200 euros á sede provincial da Asociación Española Contra o Cancro (AECC) en Ourense, resultado das iniciativas solidarias levadas a cabo ao longo do ano. A recadación procede da venda de pulseiras solidarias, así como doutros artigos ofertados en diferentes eventos e mercadiños organizados pola entidade en Cenlle. Esta achega contribuirá ao programa da AECC centrado nas «Axudas económicas para situacións de emerxencia social», unha liña de actuación que busca apoiar a pacientes oncolóxicos en situacións de vulnerabilidade e con escasos recursos económicos.
En Allariz, a segunda edición da Pasarela Solidaria, celebrada no Hotel Oca Vila, logrou reunir un total de 3.458 euros mediante a venda de rifas, unha cantidade que tamén foi integramente entregada á Asociación Española Contra o Cancro de Ourense. Esta achega contribuirá ao obxectivo da entidade de alcanzar unha taxa de supervivencia do 70% en cancro para o ano 2030, a través da promoción da investigación e o apoio ás persoas afectadas.