«En 'Ilustrísima' hai un bo guión e un excelente material para unha película»

O curso de Celanova acolleu unha ponencia de Ángel de la Cruz e Diana López sobre as posibilidades da obra de Casares


ourense / LA VOZ

A relación de Carlos Casares co mundo audiovisual foi moi estreita. O escritor ourensán deixou pegadas da mesma nos seus artigos da sección Á marxe, de La Voz de Galicia, e na mostra Os mundos de Carlos Casares -a proposta expositiva central das Letras Galegas 2017- figuran materiais que dan conta desta afección: as súas cámaras de filmación, o seu carné de socio do Cineclube Padre Feijoo e mesmo a súa participación nas Xornadas de Cine de Ourense dos anos 70. E a súa paixón polo cine, xunto coa realidade e os posicionamentos que se daban nunha cidade pequena e fondamente relixiosa como o Ourense da primeira metade do século pasado, quedou inmortalizada nun dos títulos de referencia da su obra literaria: Ilustrísima.

E sobre autor e obra centrou unha das ponencias que se presentaron onte no Curso de Medios Audiovisuais de Celanova. Os guionistas Ángel de la Cruz e Diana López foron os encargados da exposición que se desenvolveu baixo o título Carlos Casares. Un guión para Ilustrísima.

Ángel de la Cruz recoñecía na súa participación no curso de Celanova que «dende a Fundación Carlos Casares e por parte de Miguel Anxo Fernández se me prantexou impartir un miniobradoiro de guión centrado nesta obra. Eu xa lera a novela hai anos mais ao volver sobre ela para este traballo atopeime de novo con algo que xa sentira no seu momento, e que ten que ver co potencial da mesma. En Ilustrísima hai un bo guión e excelente material para unha película».

De la Cruz e Diana López lembraron que a obra recolle a relación de Casares co cine, a importancia deste na cidade, as reaccións contrarias que provoca no bispo de Ourense e no clero, a presenza dos ambulantes que chegaban aos pobos e ás cidades coas súas caravanas para facer as proxeccións e as ilusións que se tecían arredor das imaxes en movimento.

Dereitos mercados por TVE

Ángela de la Cruz sinalou que «nós desenvolvemos as pautas que poñemos en marcha, Diana López Varela e máis eu, á hora de adaptar un guión e así fomos pechando as diferentes etapas: desenvolver a idea, posicionarse para saber que tipo de obra tes entre as mans, facer unha boa síntese, unha sinopse, traballar a estrutura con todos os seus puntos de xiro, golpes de efecto, traballar a escaleta, tratamento e todo o demais. Non teríamos un guión, pero si todas as pautas a seguir para materializalo». Lembrou De la Cruz que TVE mercou no seu día os dereitos de Ilustrísima para facer unha adaptación audiovisual, aínda que nunca se chegou a materializar o proxecto.

Tamén recoñeceu que unha posible adaptación cinematrográfica presentaría dúas dificultades. Dunha banda estarían os monólogos interiores de moitos dos personaxes -entre eles o propio bispo- e doutra a escasa presenza feminina na trama. Darlle protagonismo ao vicario -para ter diálogos- e á relixiosa que figura na novela -ou á muller que chega no grupo de ambulantes italianos- serían para el posibeis solucións.

Novo proxecto e premios Goya

Ángel de la Cruz, que conta con tres premios Goya, e Diana López tamén falaron do seu novo proxecto de animación: Memorias dun home en pixama. Segundo as previsións coas que traballan a cinta presentarase en setembro, esperan poder entrar na selección do Festival de San Sebastián, e chegará ás salas a finais de ano o comezos do 2018. O obxectivo é entrar nos Goya, aínda que a nova entrega de Tadeo Jones «vai pór difícil o premio».

Curso e mostra. O Curso de Medios Audiovisuais dá este ano un especial protagonismo a Casares e inclúe a mostra sobre a súa relación co cine.

Ponencia. Sobre este vencello falará hoxe Miguel Anxo Fernández na xornada de clausura do CEMAC.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Comentarios

«En 'Ilustrísima' hai un bo guión e un excelente material para unha película»