Ángela Pérez, de terceiro da ESO, gañou a viséxima edición do certame galego de relato oral, un concurso no que o seu instituto é laureado curso tras curso
30 dic 2021 . Actualizado a las 05:00 h.Ángela Pérez Vázquez vén de gañar a edición de 2021 do certame de relato oral Tíralle da Lingua, na súa vixésima edición. É alumna de terceiro de ESO do IES Aquis Querquernis de Bande, centro que leva nove anos participando neste concurso de ámbito galego e que sempre acada algún recoñecemento. Desta volta, Ángela gañou o primeiro premio na categoría de primeiro ciclo de ESO, preparando a interpretación e posta en escena do relato Os chepudos e as bruxas.
«Meu profesor deume varios relatos a escoller e gustoume este para interpretalo e porque se podía dramatizar», comenta a gañadora. Era un texto de dúas páxinas e duraba uns catro minutos para contalo. Os intérpretes poden facer variacións para adaptalo a súa forma de expresarse. Este é un texto de autor, pero outras veces elíxense historias populares. É un bo exercicio de memorización, valora a alumna. Ángela, veciña de Xordos (Bande), é galegofalante e gústalle ler, tanto en galego, como en inglés ou castelán, di.
Como xa acontecera no curso pasado, a causa da pandemia a fase final do certame, que organiza a AS-PG (Asociación Socio-Pegagóxica Galega), fíxose en formato gravado. Ángela Pérez conta que lle saíu ben á primeira, e iso é porque practican moito nas clases de Lingua Galega co seu profesor Xoán Carlos Domínguez.
Esta alumna xa participara en anteriores edicións, e o xurado —formado pola ensinante Beatriz Maceda, a filóloga Enma Pedreira e a bibliotecaria Xiana de la Peña— seleccionouna como a mellor da súa categoría. O premio inclúe cartos como agasallo. No laureado IES banduense xa preparan a edición do curso 2021/22, cunha primeira selección de participantes que se fai no centro.