O festival internacional abriu as súas portas con nove propostas e un recordo especial para Francisco García
17 may 2026 . Actualizado a las 05:00 h.O Festival Internacional de Xardíns de Allariz (FIXA) inaugurou este sábado a súa décimo sexta edición, transformando o seu recinto nun espazo de reflexión arredor da liberdade. Este concepto serviu de fío condutor para que paisaxistas de todo o mundo proxectasen a súa creatividade en espazos que convidaron a romper barreiras e conectar coa natureza. A cita consolidou a súa difusión exterior con proxectos chegados de catro continentes e un total de 56 propostas presentadas.
A alcaldesa, Cristina Cid, e o presidente da Deputación de Ourense, Luis Menor, encabezaron o acto de inauguración, que contou con música en directo e intervencións artísticas. Durante a apertura, convidouse ao público a reflexionar sobre a liberdade, que nesta edición funcionou como un lenzo en branco para profesionais do deseño de todo o planeta.
As nove propostas seleccionadas xa puideron visitarse no recinto. Estas creacións están acompañadas polos dous xardíns gañadores no 2025 e polo reservado para os centros educativos de Allariz, que pon en valor a implicación da comunidade escolar. Entre eles destacan iniciativas internacionais como Ék-tasis, de Portugal; Time out. Free yourself from the digital, de Austria; Hortus Captivus, de Italia; ou The garden of floral disobedience, unha colaboración entre Sudáfrica e os Países Baixos. Tamén se poden ver propostas froito de alianzas bilaterais como Libre albedrío, de Colombia e Chile; e Umbrales y refugio de libertad, de México e Barcelona, xunto con deseños que chegan de diferentes puntos do Estado como Bam-Boom, de Murcia; e Liberar poñendo límites, de Madrid.
Ademais das autoridades locais e provinciais, o acto contou con representantes do ámbito académico e profesional, como Juan Antonio Caridad (UDC), Raquel Casas (UPM) e membros da Asociación Española de Paisajistas (AEP) e de Agaexar. Tamén estiveron presentes algúns dos participantes deste ano, premiados da anterior edición e moitos veciños.
«Hoxe é un día de ledicia pero tamén de moita emoción. Francisco García está hoxe con nós en cada recuncho deste recinto que el tanto amaba», manifestou Cristina Cid durante a súa intervención, dedicando unhas palabras moi especiais a quen foi o motor do certame e exrexedor da vila, falecido a principios deste ano. Nun dos instantes máis emotivos, a alcaldesa fixo entrega aos seus familiares alí presentes dun cadro del no propio certame internacional. «A mellor homenaxe que podemos renderlle é seguir traballando coa mesma ilusión para que Allariz sexa unha ventá aberta ao mundo onde a arte e a natureza se dan a man», concluíu a alcaldesa.
Tras o peche institucional, o público asistente puido realizar o primeiro percorrido polos xardíns, unha visita enriquecida pola música de Daniel López, as coreografías da escola de danza Bayadere e sesións de ioga a cargo do Recuncho do Silencio. Con esta nova edición, Allariz reafirma o seu compromiso coa recuperación do espazo público e a promoción da cultura e a sostibilidade, convidando á veciñanza e visitantes a descubrir os novos Xardíns da Liberdade, que permanecerán abertos ata o outono. No transcurso do acto lembrouse a excelencia da edición pasada, destacando o traballo de Claudia Carolina Avila con El Jardín de Rocallas, que recibiu o premio do xurado técnico, e do equipo formado por Mónica Alonso, Lucía González e Isabel Gutiérrez con ¡Se chove, que chova!, destacado polo público.