Florencio Delgado Gurriarán protagoniza o «De Perto» do Barco

m. cobas O BARCO / LA VOZ

OURENSE

Talía Teatro actuará no Barco o 15 de xullo BASILIO BELLO

O ciclo cultural ao aire libre celebrarase do 1 ao 15 de xullo nos xardíns da Casa Grande de Viloira

22 jun 2022 . Actualizado a las 05:00 h.

O ciclo De Perto que organiza o Concello do Barco de Valdeorras sacando a cultura á rúa fai dez anos. E nesta nova edición Florencio Delgado Gurriarán, o poeta de Córgomo que protagonizou o Día das Letras, é o fío condutor de varios dos espectáculos que o público poderá gozar entre o 1 e o 15 de xullo nos xardíns da Casa Grande de Viloira. Non podía ser doutra maneira neste ano de Florencio, dixo a concelleira de Cultura, Margarida Pizcueta, na presentación do cartel, que é obra da valdeorresa Celia Rey, que firma as súas obras gráficas como Rei Cabezudo.

Regístrate gratis y recibe cada mañana en tu correo las principales noticias del día

Abre o programa de actuacións a colombiana Carolina Rueda, cunha proposta titulada Gentes, caminos y sucesos. Fará un percorrido polos máis de 30 anos de carreira como narradora. Porque as contadas serán constantes neste ciclo. O día 2 será o momento de Pep Bruno, un catalán afincado en Guadalaxara que presentará Este cuento vino a mí..., unha selección de contos tradicionais nos que o viño, a comida e a celebración do amor son protagonistas.

Anxo Rei recupera o seu disco

O martes 5 actuará Anxo Rei. O cantautor valdeorrés interpretará os temas de Fronteira de Cegoñas, o disco que publicou no 2003 musicando os versos de Florencio. Ao día seguinte tocaralle á poeta Fátima Delgado, coa peza O tío Florencio, no que percorre a súa relación persoal coa figura de Delgado Gurriarán a través do arquivo familiar que atesouran a súa nai e a súa tía. O venres 8 de xullo, Paco Campos e Domingo Díaz Docampo presentarán Cantarenas na noite un recital poético-musical con soporte audiovisual por algúns dos versos máis representativos do poeta de Córgomo.

O martes 12 estará no Barco a agrupación teatral Furafollas coa obra Movendo os marcos, protagonizada por Anxo Baranga e Branca Cotado, valdeorreses afincados en Barcelona que reflexionan con humor sobre os problemas da Galicia do noso tempo. O día 13, Eugenia Manzanera presentará De amor y de muerte, unha sucesión de historias nas que morre alguén (de maneira tráxica, pero tamén cómica ou apaixonada). Pechará o décimo De Perto o humor de Talía Teatro. Toño Casais e Artur Trillo representarán A parábola do angazo, unha comedia arredor da lingua e os seus usos.

Todos os espectáculos comezarán ás 20.30 horas agás o último, previsto para as 22.30. A entrada é de balde.