A provincia de Ourense énchese de opcións para festexar a Delgado Gurriarán

La Voz OURENSE

OURENSE

Florencio bailando a muiñeira, na súa casa de México
Florencio bailando a muiñeira, na súa casa de México Arquivo familiar Delgado Gurriarán

Varios municipios organizan actividades para celebrar unha fin de semana previa ás Letras Galegas dedicadas ao autor valdeorrés

13 may 2022 . Actualizado a las 18:31 h.

O Día das Letras Galegas, dedicado a Delgado Gurriarán, está a piques de chegar. Por iso as iniciativas e actividades para festexar a data e lembrar ao autor valdeorrés non paran de sucederse. Ao longo da provincia haberá propostas teatrais, musicais e literarias en honor a Florencio. 

En Vilamartín de Valdeorras

O pobo natal do escritor está engalanado con motivos decorativos, que realizaron os veciños nos últimos meses. En Córgomo, Vilamartín de Valdeorras, festexarán a Delgado Gurriarán o propio Días das Letras Galegas. O martes, ás 12.30 horas, na Aira dos Bolos, terá lugar o acto oficial da Real Academia Galega. Ás 14.00 horas será a florenciada, unha alborada e encontro popular coa veciñanza por distintos puntos da aldea, na que non faltarán os petiscos. Ás 18.00 horas Acordeireta dará un concerto na Aira dos Bolos. 

Ata o día 29 de maio, no centro sociocultural Santa Lucía estará exposta a mostra Compromiso na distancia, que afonda na vida e obra de Delgado Gurriarán.