As Bonitas de Sande, de Cartelle, serán o único entroido ourensán no Festival Internacional da Máscara Ibérica de Lisboa

La Voz OURENSE / LA VOZ

OURENSE

A Banda de gaitas de Xinzo ofreceu un concerto o domingo na cidade portuguesa

31 ago 2021 . Actualizado a las 05:00 h.

Dende o ano 2006 a cidade de Lisboa acolle o Festival Internacional da Máscara Ibérica, un encontro que reúne a entroidos e máscaras de toda a península e que conta cunha importante presenza dos persoeiros e as máscaras máis tradicionais do entroido galego.

Máscara Ibérica está a celebrar unha edición reducida, por mor da pandemia, e desta volta só haberá un entroido da provincia de Ourense que participará no encontro portugués: as Bonitas de Sande. Neste 2021 o festival celébrase no marco de Lisboa na rúa, que se corresponde coas festas da cidade.

Será o vindeiro sábado, día 4 de setembro, cando un grupo das Bonitas de Sande -unha das representacións singulares do entroido en Cartelle- acompañadas polos personaxes do oso e a vaca -outras das figuras protagonistas da festa no municipio ourensá- visiten o Museo da Marioneta, institución que alberga o edificio do Convento das Bernardas. Na cita está previsto que a delegación de Cartelle amose «ao público asistente a súa vestimenta tradicional, na que destaca a máscara feita con fino arame, ademais do gorro feito en madeira no que sobresaen catro picos recubertos de plumas de aves».

No encontro de Lisboa participarán este ano outros entroidos galegos. É o caso dos de Samede (A Coruña) e Cobres (Pontevedra). O Festival Internacional da Máscara Ibérica é un certame que potencia o coñecemento, a promoción e a difusión de diferentes aspectos da cultura popular e sempre cun tema central, o da máscara. Así, diferentes máscaras chegadas dende varios puntos da península desfilan polas rúas de Lisboa, ao tempo que se desenvolve un amplo programa de actividades paralelas.

Gaiteiros de Xinzo

A Máscara Ibérica, que se está a desenvolver do 21 de agosto ao 29 de setembro, contou este ano coa presenza da Banda de gaitas de Xinzo de Limia. O pasado domingo, día 29, os músicos limiaos actuaron no castelo lisboeta de São Jorge. A alcaldesa, Elvira Lama, acompañou aos músicos e destacou a calidade do concerto.