Reisvas, máis e mellor que a televisión

Javier G. Sobrado OURENSE

OURENSE

Reisvas Santi M. Amil

Adrián é o «streamer» galegofalante ourensano por antonomasia

21 abr 2021 . Actualizado a las 05:00 h.

O streaming é un dos fenómenos en boga nos últimos tempos. En Galicia existe unha pequena pero emerxente comunidade de xente que emite contidos na lingua nai e, desde outubro do ano 2020, neste grupo hai representación ourensá. Adrián Reis, mellor coñecido como Reisvas, comezou neste mundiño sen coñecer a existencia dunha comunidade -representada na conta «Twitch en Galego»- á que agora pertence.

Xogar a videoxogos e comentar as partidas, unha das tendencias máis seguidas entre os streamers, é unha das cousas que un pode atopar no espazo deste ourensán de 23 anos. E aínda que hoxe tamén xoga aos famosísimos Fortnite ou Rocket League, el asegura que ás veces prefire «outros máis humildes e calmados que permiten interactuar cos seguidores, coma GeoGuessr». Porén, Reisvas xera moito máis contido, de feito asegura que o que fai é «variado e en constante evolución».

Amante das linguas e mestre de inglés, Adrián recorda como un dos seus mellores momentos na Rede cando, nun directo de AmongUs entraron cativos bastante máis mozos ca el. «Comezaron a falar en galego aínda que se notaba que non eran galegofalantes. Nese momento dixen ‘isto é o que quero'». En comparación con entretementos máis tradicionais, Reisvas admite que o streaming resúltalle «mellor que a televisión, porque aquí podes interactuar».

Polo de agora, prega que a xente apoie o uso do galego nas redes e tenta, xunto a outros, que sexa lingua vehicular en Twitch, algo para o cal xa existe unha petición asinada por máis dun milleiro de usuarios.