Unha rodaxe en Allariz foi o inicio da relación de Cuerda con Ourense

x. m. r. OURENSE / LA VOZ

OURENSE

Santi M. Amil

A curta «Primer amor» e «Los girasoles ciegos» foron os outros traballos do director

11 feb 2020 . Actualizado a las 12:10 h.

Hai imaxes que van rematando por ser a icona dunha iniciativa, un proxecto ou calquera outra actividade. Poñamos por caso una película. En A lingua das bolboretas, a película rodada por José Luis Cuerda en Allariz -de forma maioritaria- e outros espazos de Galicia, ben podería ser aquela na que o mestre, interpretado por Fernando Fernán Gómez aparece escoltado por máis dunha ducia de rapaces á beira do río. Como a da Praza de Abaixo convertida nun patio de recreo ou o local dun antigo banco virado en espazo de ensino, soños e descubertas.

A gravación de A lingua das bolboretas en Allariz converteuse nun acontecemento na vila, e para o director foi a porta de entrada a unha relación con Ourense que xa non fixo máis que medrar ata ser o espazo onde se rematou por reivindicar Cuerda como veciño por desexo e vontade propia.

Aínda que as referencias que sempre se asocian ao realizador de cine que finaba a pasada semana son a cinta rodada en Allariz e Los girasoles ciegos -gravada en Ourense- hai un terceiro proxecto que desenvolveu na provincia, aínda que o percorrido e a repercusión do mesmo non foron iguais ao ser un traballo para unha canle audiovisual.