Lembranzas de catro décadas de ofrendas florais para Blanco Amor

O profesor Díaz Leyes recordou como naceu e se mantivo a homenaxe anual


ourense / la voz

No mesmo escenario no que en 1979 se xuntaban intelectuais, políticos, cidadáns e amigos de Eduardo Blanco Amor para despedirse do xornalista e escritor atopáronse, corenta anos despois, algúns dos que aquel día de decembro do 79 estiveron en San Francisco para darlle o derradeiro adeus ao autor de A Esmorga ou La catedral y el niño -entre outras obras-, os representantes institucionais, cidadáns e os alumnos do instituto que leva o seu nome. As persoas chamadas a manter viva a memoria de Blanco Amor e a ser os protagonistas da historia da cultura, a política e a literatura galega no futuro, como sinalou Luís González Tosar -director da Fundación que leva o nome do homenaxeado-.

Corenta anos despois do pasamento do escritor, na ofrenda anual tivo un protagonismo especial a memoria de EBA dende unha perspectiva diferente: a dos promotores da ofrenda anual e dos que pularon por manter viva a lembranza do escritor. José Luis Díaz Leyes, exdirector do IES Blanco Amor e profesor do centro, lembrou que se fixo amigo do intelectual grazas á súa veciña e compañeira de docencia María do Carmo Henríquez Salido.

O escritor ía xantar de cando en vez á casa da profesora e Díaz Leytes lembrou as tertulias daquel tempo, como o autor acudía a participar nas clases de Henriquez Salido ou a impartir galego de xeito altruísta. O profesor tamén lembrou como se tiveron que empregar a fondo -ata a dirección propuxo candidatos alternativos- para sacar adiante a proposta da profesora para darlle o nome de Blanco Amor ao instituto en 1980; e como dende a morte do escritor María do Carmo Henriquez Salido, primeiro, e logo o propio instituto mantiveron viva a ofrenda anual que dende hai anos se potenciou grazas á implicación do Pen Clube Galicia -da man de Tosar- e agora co respaldo da Deputación e a fundación.

No acto do cemiterio Luís González Tosar lembrou o compromiso cidadán e político do escritor -«foi un loitador pola autonomía de Galicia»- e o apoio das institucións, coa Deputación á cabeza, para reivindicar a súa figura e a súa obra. O director xeral de Políticas Culturais da Xunta, Anxo Lorenzo, incidiu no moito que se ten feito nos últimos dez anos a prol da recuperación e valoración do escritor e a súa obra -de feito destacado a creación da Fundación Eduardo Blanco Amor- e Rosendo Fernández incidiu na aposta do organismo para reivindicar ao autor.

En nome do Concello falou Manuel Álvarez (DO), quen incidiu no compromiso do escritor coa emigración e Rafael Villarino puxo ao autor como exemplo do implicación a prol da cidade.

Como cada ano, os alumnos do IES Blanco Amor participaron lendo os seus traballos diante do tumba do escritor.

Conoce nuestra newsletter con toda la actualidad de Ourense

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
0 votos
Comentarios

Lembranzas de catro décadas de ofrendas florais para Blanco Amor