César Fernández Gil: «Iremos a acordos para sacar adiante os grandes proxectos»

O rexedor municipal, do PP, afronta un mandato en minoría na capitalidade da comarca do Ribeiro


ourense / la voz

Contra todo prognóstico o PP fíxose coa alcaldía de Ribadavia. O non conseguir a maioría absoluta para gobernar en solitario e o feito de completar a corporación PSOE, Ribeiro en Común e BNG descartaron aos populares para calquera pacto de goberno. E así, sen negociación e por ser a lista máis votada, o portavoz desta formación conseguiu recuperar a alcaldía da capital do Ribeiro para o PP ao non haber pacto pola esquerda. César Fernández Gil exercía ata o de agora como concelleiro en Ribadavia e deputado autonómico. En Compostela presidía a Comisión de Xustiza e Interior e era o portavoz da de Educación e Cultura.

-Presentou a renuncia no Parlamento?

-A primeira hora mandouse o certificado do acordo plenario e a partir de aí, e en base á figura da «incompatibilidade sobrevenida» o Parlamento xa procede a tramitar a baixa como deputado.

-Que se fai no primeiro día de traballo como alcalde?

-Atender todas as necesidades que se prantexan dende o punto de vista burocrático: habilitar a firma electrónica e todo o que demandan os funcionarios responsables do día a día no Concello de Ribadavia.

-Ten definidas xa as responsabilidades do seu grupo?

-A nosa intención é celebrar un pleno o vindeiro día 27 para someter a aprobación todo o relacionado coas comisións, asignacións e demais. En principio non sabemos como vai ser porque o resto dos grupos aínda non presentaron os escritos designando portavoces e demais.

-Asumirá algunha das concellerías?

-Aínda non o sei. Polo de agora só temos o trazo groso do que pode ser o novo goberno municipal, de feito imos ter unha xuntanza agora para empezar a miralo.

-E nese «trazo groso» que figura?

-Que Clara Loeda vai levar Servizos Sociais, Yolanda Gómez será responsable de Cultura, os Servizos Municipais serán cousa de Miguel García e María Luz Expósito será a encargada de Obras. E logo iremos completando e asignando responsabilidades.

-Un dos puntos de desacordo no pasado mandato foi o das asignacións das dedicacións. Como van facer vostedes?

-Manteranse as dúas asignacións e coas cantidades que están fixadas na actualidade.

-Vai ser alcalde con cinco concelleiros, dos trece que ten a corporación. Confía en sacar adiante o mandato en minoría?

-Díxeno na toma de posesión e mantéñoo: a miña intención é chegar a acordos cos outros grupos políticos para sacar adiante os grandes proxectos para Ribadavia. A miña vai ser a xestión política da man tendida.

-Que prioridades se marca?

-As que figuran no noso programa. Somos ambiciosos e queremos cumprilas ao 100 % neste primeiro mandato. Acometer as obras pendentes en infraestruturas de abastecemento e saneamento, potenciar os servizos sociais, ampliar o polígono e atraer empresas para crear postos de traballo e asentar poboación, desenvolver proxectos que abran Ribadavia aos seus ríos -Avia, Miño e Maquiáns- e moitas outras actuacións.

-Decátase que vai ser o alcalde que inaugure o Museo do Viño de Galicia?

-Cando iso se produza será unha moi boa noticia para O Ribeiro e para toda Galicia.

Conoce nuestra newsletter con toda la actualidad de Ourense

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
0 votos
Comentarios

César Fernández Gil: «Iremos a acordos para sacar adiante os grandes proxectos»