«Un voto en Ourense a Vox ou Ciudadanos é un voto a Sánchez»

Vázquez di que o PP é o único partido que está facendo propostas máis alá do problema catalán


Ourense

Pese a que ten una ampla experiencia parlamentar -foi deputada na sétima, oitava, novena, décima e duodécima lexislaturas-, esta é a primeira vez que Ana Belén Vázquez (Bande, 1975) encabeza a candidatura do PP en Ourense. «Se queremos un presidente que non teña peaxes cos terroristas nin con independentistas, temos que elixir a Pablo Casado», di a cabeza de lista popular, amiga e colaboradora do actual presidente do partido.

-¿Gústalle o rumbo que tomou o PP con el á fronte?

-Si, a verdade é que estamos sendo o único partido que estamos a facer propostas máis alá do problema catalán, sobre a revolución fiscal, o reto demográfico, a ocupación ilegal de vivendas o tema laboral... E, ademais, estamos facendo a campaña tamén en clave de Ourense e de Galicia.

-¿Está cómoda coa posición de Casado respecto do Estado das autonomías e o freo á transferencia de competencias?

-Iso non vai recollido no programa electoral. Si que propuxo que a competencia que tiña transferida Cataluña de prisións revertera outra vez ao Estado. Eu reuninme fai uns días cos funcionarios de prisións e eles mesmos tamén o pedían. É un cachondeo o que están facendo nas prisións de Cataluña cos golpistas.

-¿E co resto das competencias, como as que ten pendentes Galicia?

-Pois mira, estando Pablo Casado de presidente, o PP foi o que pediu a competencia da transferencia da AP-9. Hai outras competencias que loxicamente si se van reivindicar, pero hai algunhas que deben formar parte básica do Estado.

-¿E que opina sobre a «lei de linguas» que propón?

-Neste caso, por exemplo en Galicia para a sanidade xa non é obrigatorio saber galego; simplemente tes unha puntuación a maiores. En cambio, en Baleares ou en Cataluña si que é obrigatorio. Nós queremos aos mellores especialistas, e máis agora que hai escaseza de médicos. Non podemos pecharlle a porta a un pediatra porque non saiba galego e iso é o que están facendo noutros sitios de España.

-¿Ten algún reparo en compartir Goberno con Vox?

-As cousas que estou escoitando de Vox danme medo e gustaríame que o apoio sexa o mínimo posible. Non é un partido que me guste.

-¿É ultradereita?

-Eu simplemente digo que me dá medo o que escoito. Eles dicían que nos quería dar pistolas e eu avogo porque nos dean máis medios para a Garda Civil e para a Policía Nacional. Eu non quero pistolas, pero tampouco quero falar das cunetas, nin de Franco... Os extremos nunca me gustaron; eu sempre fun de centro.

-Por iso insiste no voto útil.

-Nós sabemos que hai un cabreo con Sánchez pero el pode ser o beneficiado en 19 provincias moi concretas onde pode levar un deputado máis polos votos que poden ir parar a Vox e a Ciudadanos. Por iso estamos apelando ao voto unido porque un voto en Ourense a Ciudadanos ou Vox é un voto para Sánchez.

-Critica moito ao PSOE polo retraso das infraestruturas, pero o PP gobernou moitos anos e tampouco se executaron, ¿non si?

-O PP chegou ao Goberno no 2011 e viñamos dun Executivo do PSOE que incluso falaba mal das infraestruturas para Galicia, con aquela famosa frase de Magdalena Álvarez, por exemplo. Tivo que chegar o Goberno de Mariano Rajoy para impulsar as obras do AVE a pesar das dificultades económicas. Hoxe xa non hai quen pare esas obras e o que temos é que puxar para que nos fagan a variante exterior, unha estación de mercancías no polígono, as autovías A-56 e A-76 ou a variante norte, que nos deixaban con cero euros nos orzamentos de Pedro Sánchez.

-¿Tratou mal o Goberno de Sánchez á provincia?

-Si. É tal o pasotismo que ten cara a provincia de Ourense que o outro día descubriu a auga quente. Eu escoitei o seu discurso enteiro e só fixo referencia a Ourense para dicir que eles fixeron máis nos últimos nove meses que o PP... «E vexo que tedes ganas de comer, ‘‘buen provecho’’». Eu estaba escoitando porque tiñamos un mitin á tarde e contaba con que falara do AVE, de infraestruturas, algo... Pero nada.

-O PP fala de reducir impostos. ¿Non significará iso reducir tamén os servizos públicos?

-Non, reducir impostos significa que a xente teña máis cartos no bolsillo e que o empresario teña máis cartos para poder seguir investindo, co cal, esta baixada de impostos vai xerar unha recadación de 16.800 millóns de euros e unha creación de máis de 400.000 postos de traballo. O PSOE quere recadar rápido, subindo o imposto ao diésel ou dicindo que temos que pagar por usar as autovías.

-Estanlle recordando moito en redes aquilo dos «softpapers» e outras polémicas. Din que non está vostede preparada...

-Cando te metes nas redes xa sabes o que hai, pero a min non me van coartar a liberdade de expresión nin me van amedrentar para que me vaia de Twitter como están facendo outros candidatos. A min chéganme ás veces mensaxes privadas que serían incluso denunciables, pero non me van asustar. Eu quero unha España en liberdade, sen insultos ou ameazas.

Conoce nuestra newsletter con toda la actualidad de Ourense

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
0 votos
Comentarios

«Un voto en Ourense a Vox ou Ciudadanos é un voto a Sánchez»