O recinto de Expourense será o gran punto de encontro para as familias. A xincana xigante inchable «Iron Children» é principal novidade da edición número dezanove do Salón da Xuventude que se celebra hoxe e mañá
05 dic 2018 . Actualizado a las 20:46 h.Expourense remata o calendario feiral do 2018 coa celebración da edición número 19 de Megaxove que entre hoxe e mañá ofrecerá 60 actividades de lecer, deportivas e solidarias que converterán ó recinto no punto de encontro para a mocidade galega e as súas familias. Para elo conta coa colaboración dunha vintena de expositores entre os que se atopan asociacións culturais e xuvenís galegas, federacións e clubes deportivos e empresas especializadas en formación.
Entre as novidades destaca a xincana xigante inchable «Iron Children ? Humor Amarelo» de 70 metros de lonxitude achegada pola Concellería de Xuventude de Ourense onde poderán participar rapaces e rapazas dende os 8 ata os 18 anos e na que tamén se realizará unha carreira competitiva onde os participantes terán a oportunidade de fomentar o exercicio físico e xerar a confianza necesaria nun mesmo para afrontar e superar os diferentes obstáculos, aprendendo o valor do traballo en equipo.
Os expositores e entidades colaboradoras con Megaxove elaboraron un completo programa de actividades que inaugura hoxe coincidindo co Día Internacional do Voluntariado, e cuxo obxectivo non é só a diversión, senón o fomento de valores como o compañeirismo, a solidariedade, o traballo en equipo, a tolerancia, a igualdade, o fomento de hábitos de vida saudables ou ó respecto ó Medio Ambiente. Todo elo transmitirase a través de actividades como a doazón de alimentos non perecedoiros que irán destinados á Operación Quilo organizada por Amencer; os obradoiros de traballos manuais con material reciclado que impartirá Cruz Vermella Ourense ou a demostración de cómo ser autónomo e ademais non contaminar obtendo enerxía con paneis solares que organiza OJE-Ourense.
Participación aberta a todos
Ademais das actividades xa mencionadas, Megaxove ofrece moitas opcións de entretemento e diversión para aqueles mozos ou nenos que, acompañados polas súas familias, se acheguen ata Expourense durante estes dous días. A empresa Nenoos Ourense impartirá un obradoiro de achegamento á tecnoloxía, robótica e programación. Dentro deste área, o salón contará tamén cunha Ciber Aula, e cun espazo adicado aos videoxogos.
Incorporase con decisión a Megaxove a Organización Xuvenil Española, OJE Ourense, que organizará varias actividades vencelladas co coidado do medio Ambiente, un obradoiro de serigrafía de camisetas, e outro de fabricación de títeres que serán despois os protagonistas dunha función aberta a todos os visitantes.
Unha das entidades máis activas con este salón volverá ser a Asociación Xuvenil Amencer que organizará unha decena de actividades. Ademais da Operación Quilo, impartirán obradoiros de maquillaxe ou traballos manuais (pompóns de la, pulseiras, hamas, chaveiros, marcos de fotos, maquillaxe, etcétera.), e ofrecerán xogos de mesa e de estratexia. Non faltarán ademais os espazos para toda a familia como o Bebechán, o Ludochán ou o recuncho para pais e nais.
Outras das entidades fieis a Megaxove son: Cruz Vermella Xuventude que organizarán obradoiros con material reciclado e xogos de mesa tradicionais; a Escola de Tempo Libre e Animación Cipri Gomes que organiza varios obradoiros (globoflexia, pintacaras, xogos...); o CCP Xaquín Lorenzo que traerá os seus xogos populares ou a Escola de Baile, Canto e Música da Deputación de Ourense que fará unha actuación o mércores ás 19.15 horas.
Neste salón serán presentados ademais os Programas para a xuventude da Dirección Xeral de Xuventude, Participación e Voluntariado.
Equipos e federacións dan a coñecer a súa oferta deportiva
O Salón da Xuventude ofrece a posibilidade de practicar actividades xa coñecidas polos visitantes, pero serve tamén de plataforma de promoción e descubrimento doutras actividades vencelladas ó tempo libre, á cultura ou ó deporte. Nesta cita ten cabida todo aquilo que anime á participación activa e á adopción de hábitos saudables.
Deporte
O deporte terá coma sempre o seu espazo en Megaxove. Expourense é o lugar elixido por asociacións e federacións para dar a coñecer estes deportes, programando distintas actividades. As principais novidades deste ano no ámbito deportivo serán as minicompeticións de atletismo, os adestramentos e clases abertas de judo e o circuíto infantil de ciclismo.
Neste salón serán presentados ademais os Programas para a xuventude da Dirección Xeral de Xuventude, Participación e Voluntariado.
O Salón da Xuventude, que conta co apoio da Deputación Provincial de Ourense e da Concellería de Xuventude do Ourense. Esta cita ten entrada gratuíta e permanecerá aberto en Expourense os días 5 e 6 de decembro. O horario do mércores 5 será de 10.00 a 13.00 e de 17.00 a 20.00 horas e o do xoves 6 de 10.00 a 14.00 e de 16.00 a 20.00 horas. O programa actualizado pódese consultar na web www.expourense.org ou no perfil de Facebook do salón.