A auga non é viño


Vostede que vive en Ourense poderá comprobar, tal e como explicaba o presidente de Confederación en La Voz onte, que «a grande proliferación de encoros na conca do Miño ten morto o río». Recorrendo a provincia vese que son demasiados os embalses espallados polos nosos ríos. Nosos porque son de todos. Estaban aí antes ca nós e seguirán (se as eléctricas non os matan antes) cando nós non esteamos. As empresas sácanlles rendemento económico, e nós beneficiámonos das comodidades que supón prender a luz ou poñer a lavadora. Todo ben. O que non semella tan ben é que nun ano libre de seca (desta volta non poden dicir que non choveu) e en pleno verán esteamos pagando a luz máis cara ca nunca. «As compañías eléctricas, lamentablemente, só pensan en termos económicos», dicía tamén José Antonio Quiroga, que é como se chama o novo presidente da CHMS. Pois haberá que facer que pensen doutra maneira... ¿Ou será que poden estragar os nosos ríos -facendo que o caudal dos ríos suba ou baixe case que sen motivo, porque nin choveu nin sumamos seca- e despois cobrarnos a luz coma se fora un artigo de luxo? E non o é. Ou non debería ser. Haberá quen o estea pasando estreito e poida renunciar ás duchas de auga quente agora que aínda sae medio morniña pola billa, pero, ¿que pasará cando chegue o inverno e os termómetros marquen baixo cero? Será outro ano máis falando de pobreza enerxética, de ourensáns que teñen que pasar frío porque non lles chega para a factura, mentres as eléctricas esquilman os ríos, que son de todos.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

A auga non é viño