«Fan fillo predilecto a Benito Losada o mesmo ano que deixan caer o Outono»

Vítor Sierra Nieves, director artístico do Outono Fotográfico, dao por «morto» pero non descarta outra cita noutra cidade


ourense / la voz

A finais do mes pasado os organizadores do Outono Fotográfico deron por desaparecido o festival. Explicaron que a decisión do Concello de Ourense de non liberar a subvención comprometida para a edición 2017, que ascendía a 9.000 euros, levaba asociada a «morte» do certame. Vítor Sierra Nieves, director artístico do Outono, afirma que foi unha decisión política máis que técnica.

-¿Está morto e enterrado o Outono Fotográfico?

-Está desaparecido. A asociación Outono Fotográfico segue viva, pero non o festival.

-¿Podería recuperarse no futuro?

-Non é viable. As perdas adquiridas son do Concello de Ourense que xa dixo que non as pagaría e ningunha outra administración pode facerse cargo. O certo é que temos pensado falar e reunirnos con outras para, ao mellor, facer outros modelos de festival e seguir facendo cousas. O Outono como se coñece dende hai 35 anos xa non ten sentido.

-¿Que outras administracións colaboran co Outono?

-Os concellos de A Coruña, Santiago e Lalín; ademais da Universidade de Vigo, a través da súa vicerreitoría. A Deputación e a Xunta saíron como patrocinadores despois da morte de Benito Losada (creador do festival). É verdade que o centro cultural pagaba os gastos do transporte das súas exposicións.

-¿O resto das administracións fixeron a súas contribucións?

-Fixeron as do 2017. E tivemos que rexeitar as deste ano porque non facemos o festival. Estaban aprobadas, pero son máis pequenas que a do Concello de Ourense e non chegan. Algunha desas administracións puxéronse á nosa disposición. Por iso dicimos que o Outono está morto, pero podemos facer outro festival noutra cidade, que tería outro nome.

-¿Como se chega ata este punto de non retorno?

-Coa programación que temos, de máis dun cento de exposicións, nada máis acabamos cunha edición, temos que comezar a organizar a seguinte. Pero a confirmación do Concello de Ourense non a temos ata moito máis tarde. Na presentación da edición do 2017, o alcalde de Ourense asistiu e aínda que non tiñamos confirmada a contribución de 9.000 euros, entendemos que coa súa presenza faino, aínda así, recordámoslle que non a temos. Dixo que non o sabía pero en novembro confirmou que si. Quedamos bastante aliviados, e móntase o festival. E en xaneiro deste ano, cando iamos facer o catálogo, onde dabamos conta de todo o que fixemos, vemos que non podemos meter o libro na imprenta, porque non recibiramos a contribución. Dende ese mes fixemos unhas once reunións coas concelleiras de Cultura e Xuventude e coa técnica. Nunca co alcalde, aínda que se lle solicitou cita en catro ocasións e nunca respondeu. Aínda que houbo encontros informais en actos da cidade onde falamos con el disto. Sempre nos dicían que había dificultades técnicas, aínda que nós sabemos que é un problema político, porque se houbera vontade de solucionalo daba igual o que dixeran os técnicos, O Concello de Ourense, como todos, sacan proxectos adiante aínda que os técnicos digan o contrario.

-¿Puxeron unha data límite a esta situación?

-Chegou un punto no que ata a técnica nos dixo: «Ourense non necesita un festival de fotografía contemporánea». É una opinión respectable, pero... Dende a asociación non podiamos retrasar máis todo o tema, porque tiñamos que comezar xa coa edición do 2018. En xuño enviamos un último escrito cunha data límite, finais de xuño. E responderon que non se facían cargo da débeda.

-Detrás da desaparición do Outono Fotográfico está o recordo de Benito Losada, o seu impulsor.

-No fondo de todo isto subxace iso. No mesmo ano que fan fillo predilecto a Benito Losada deixan caer o Outono Fotográfico, o evento mais importante que creou, por 9.000 euros. Pero non é a primeira vez que sucede algo así, aínda que con eventos con menos forza que o Outono Fotográfico. Foron os casos da Bienal de Caricatura, da Bienal de Banda Deseñada... Foron deixándose morrer.

«O máximo responsable non é a área de Cultura é o alcalde de Ourense»

-¿Houbo algunha conversa co Concello despois do anuncio da desaparición?

-Non.

-¿E cos partidos políticos?

-Si, con todos, tamén co PP. Enviámoslle unha comunicación, sobre todo aos grupos da oposición. Non para que fagan presión para que cobremos os 9.000 euros, senón para que fiscalicen onde foi a partida que está aprobada nos orzamentos, que están prorrogados. A partida que era para o Outono Fotográfico.

-O Outono Fotográfico, o festival de cine....

-O que pasa en Ourense non é casual. Nos últimos meses estanse cargando absolutamente todo. Agora ben, despois do cristo mediático que se montou xa cambiou o ‘modus operandi’ e o teatro parece ser que se recupera, aínda que tamén estaba pendente. A Miteu, a MOTI e o Fito estaban exactamente igual que o Outono na semana que nós anunciamos o peche. Parécenos ben que soubesen recuar.

Seguir leyendo

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

«Fan fillo predilecto a Benito Losada o mesmo ano que deixan caer o Outono»