A Xunta crea o premio Otero Pedrayo de ensaio en galego

O novo certame pretende fomentar o idioma e máis o coñecemento xeográfico e cultural do territorio galego


ourense / la voz

O premio Otero Pedrayo de Ensaio nace cunha dobre vertente. Por un lado, a Xunta busca fomentar a mellora do coñecemento xeográfico e paisaxístico de Galicia desde a vertente do patrimonio cultural, ao mesmo tempo que se promove a investigación e a produción ensaística sobre esta materia en lingua galega. Así mesmo, este recoñecemento servirá para homenaxear a figura do ilustre intelectual ourensán, polígrafo, intérprete e investigador da xeografía, o territorio, a paisaxe e a cultura do país.

O premio, cuxa primeira edición xa se está a preparar pola carteira de Cultura, estará dotado con 5.000 euros e recoñecerá textos inéditos escritos en galego conforme á normativa vixente, en relación con labores de investigación e produción de coñecemento sobre a paisaxe e patrimonio cultural de Galicia. Para outorgalo valoraranse, entre outras cousas, a orixinalidade do enfoque e os elementos de innovación e creación, a singularidade da perspectiva histórica ou metodolóxica e a calidade literaria do texto.

A primeira edición do galardón -segundo anunciou o conselleiro de Cultura, Román Rodríguez, no seu encontro de onte co presidente da Deputación de Ourense, Manuel Baltar- convocarase este mesmo ano e fallarase no vindeiro 2019.

Poderá optar ao premio calquera persoa física, maior de idade, que presente un texto sobre a devandita materia, con carácter divulgativo, e cunha extensión entre os 150.000 e 450.000 caracteres, incluíndo espazos. As datas de presentación de traballos daranse a coñecer nos próximos meses.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

A Xunta crea o premio Otero Pedrayo de ensaio en galego