«O que nos foi roubado polos Franco ten que volver ao patrimonio galego»

Nuria López recolleu hoxe o premio Xosé Aurelio Carracedo de xornalismo

.

Ourense

Hoxe, coincidindo co Día da liberdade de prensa, terá lugar a entrega do premio Xosé Aurelio Carracedo, creado en homenaxe ao xornalista de La Voz de Galicia falecido no ano 1988. A galardoada deste ano é a coruñesa de 42 anos Nuria López Presedo por unha serie de reportaxes sobre o patrimonio espoliado polos Franco en Galicia.

-¿Que lle parece que a Administración aposte por este tipo de premios?

-Penso que é importante que se aposte por este tipo de premios porque tamén nos pode valer a nós para querer facer traballos en profundidade. No periodismo todo é tan efémero e todo caduca tan pronto, sobre todo na radio, que este tipo de premios valen para poñer en valor o traballo que facemos día a día e que pasa desapercibido na maior parte dos casos.

-Fálase moito dunha crise crónica no xornalismo. ¿Pasa a profesión por un bo momento en Galicia?

-O xornalismo en Galicia nunca pasou por moi bo momento. A irrupción de Internet e das redes sociais poden servirnos un pouco de complemento para intentar construír un discurso diferente, pero temos que poñernos as pilas para que non nos adianten. E despois hai un perigo, que son as fake news e como discernir entre o crible e o incrible. Penso que temos que poñernos a traballar en serio e, sobre todo, superar o problema que temos coa precariedade, que está acabando coa profesión, literalmente.

-Con respecto ao traballo premiado, ¿como organizou a recollida de información?

-O éxito quizais estivo nas fontes, que me aportaron puntos de vista diferentes e que enriqueceron ese traballo. Todo naceu en novembro, cando decidín facer unha reportaxe sobre o espolio do franquismo para un programa que naceu nesa temporada, que se chama Panorámica. Fíxena, emitiuse, pero intentara localizar tantas fontes que despois de tela emitido falei con máis e plantexei a posibilidade de facer unha serie de reportaxes para afondar un pouquiño máis.

-Todos coñecemos o pazo de Meirás, pero o patrimonio dos Franco en Galicia é moito máis amplo. ¿Sorprendeulle a magnitude das súas propiedades na comunidade?

-Si, e estou convencida de que hai moitísimo máis do que eu comentei nas reportaxes. Quizais quedeime nos exemplos que todos coñecemos: Meirás, as estatuas de Abraham e Isaac, a casa de Cornide ou o pazo do marqués de Bendaña, que foi literalmente espoliado e trasladado pedra a pedra... Son moitísimos elementos e moitos deles probablemente nin os coñecemos nin están catalogados. O presidente da Academia das Artes, Quintana Martelo, di que están traballando en serio para intentar recompoñer todo ese puzle. O que nos foi roubado ten que volver ao patrimonio galego.

-¿Cre, entón, que a Administración autonómica debe loitar pola devolución dese patrimonio aos galegos?

-Si, pero non me parece doado. Falei cun avogado que traballa habitualmente nos asuntos relacionados coa memoria histórica e el comentaba o complicadísimo que vai ser recuperar todo o espoliado. Existen moitas limitacións pola lei de amnistía e por cuestións da de memoria histórica que non están suficientemente desenvolvidas. Vai ser difícil que todo o que nos roubaron volva ao pobo galego, que é o seu verdadeiro propietario.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

«O que nos foi roubado polos Franco ten que volver ao patrimonio galego»