«Vimos necesario organizar aos usuarios do CHUO»

Sabela Rodríguez exerce de voceira eventual dunha asociación de pacientes e usuarios do CHUO


OURENSE / lA VOZ

Sabela Rodríguez Vázquez, una estudante de Educación Social, exerce, de forma eventual e mentres o colectivo non se estruture definitivamente, de voceira dunha asociación de pacientes do CHUO recen creada. Onte celebraron a súa segunda asemblea.

-¿Como xurde a idea de crear unha asociación de usuarios?

-Empezou nun grupo de persoas que estabamos apoiando a loita dos traballadores que se pecharan na planta baixa do hospital para protestar contra o peche de camas. Estivemos colaborando na recollida de firmas, e cando estábamos alí tamén empezaron a moverse as traballadoras da limpeza, da empresa Ferrovial, e tamén estivemos apoiándoas. Os traballadores sempre se queixaban de que non había apoio por parte dos usuarios e vimos necesario abrir un espazo para organizar aos usuarios.

-¿E percibiron vostedes ese desinterese nos usuarios?

-Cando estábamos recollendo firmas moita xente che contaba casos. Nós víamos que si que se estaban dando conta das consecuencias do que estaba pasando, pero como que culpaban aos traballadores: as enfermeiras, os médicos...; mentres que os traballadores estaban mobilizándose para defender os dereitos dos usuarios. Por iso vimos necesario organizarnos, analizar qué pasaba e ver ónde estaba o problema de raíz. Difundimos a convocatoria dunha asemblea. A verdade é que pensábamos que seríamos quince persoas, pero apareceron sobre cen.

-¿Cales son as demandas?

-Empezamos polo das camas que querían pechar, pasando de 41 a 36 por unidade. Agora parece que a xerencia falou cos traballadores e dixo que van a manter as 41 camas estruturais, e dicir, dotalas de persoal fixo, porque antes se sacaba de listas de contratación e se movía por outras unidades. O que pasa é que o presuposto mantense igual e non se contrata máis persoal, entón o persoal fixo que vai atender esas 41 camas se saca doutras unidades, e nesas tamén se xera un oco que vai ser cuberto por persoal que vaia rotando ou ben se saque de listas de contratación. Nós entendemos que aínda que se solucione o problema concreto das 41 camas, se non se aumenta o presuposto e a contratación, é mover a precarización dunha unidade a outra. Estamos co das instalacións do hospital novo. Parece que a distribución arquitectónica se fixo sen consultar as necesidades do persoal; non ten cociña pero si outros servizos de pago que ao mellor non eran tan prioritarios. E tamén nos preocupa o asunto das listas de espera e a lei de garantías que establece uns prazos máximos nos que podes estar esperando na sanidade pública, senón te derivan á privada e se o rexeitas te penalizan. Son as primeiras, pero queremos preparar unha lista de puntos e reivindicacións básicas para darlle difusión e movernos a partir de aí. Queremos ver tamén cómo podemos achegar a asociación á xente no hospital, especialmente aos maiores, porque eles non están nas redes sociais.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
6 votos
Comentarios

«Vimos necesario organizar aos usuarios do CHUO»