O Centro Médico El Carmen recibe o premio «Líderes en Calidade» de Expourense

«A calidade transforma» é o lema do Día Mundial que se celebra este xoves e que Expourense conmemorará cunha xornada que inclúe a entrega dos Premios «Líderes en Calidade» a empresas e institucións galegas recoñecidas por ser un modelo a seguir nos seus respectivos sectores. Esta iniciativa conta co apoio do IGAPE e ten como obxectivo sensibilizar tanto a empresas privadas como a entidades públicas da necesidade de incorporar aos seus modelos de xestión as directrices da calidade e do medio ambiente, co fin de prestar servizos eficientes e acadar a satisfacción do cliente. Deste xeito, poténciase a existencia de empresas e administracións competitivas nun escenario globalizado.

Por sexto ano consecutivo, un xurado integrado polo Comité Executivo de Expourense, a entidade de certificación AENOR e a consultora Serviguide, elixiu ás empresas e institucións merecedoras dos galardóns. As entidades elixidas son no sector sanitario Centro Médico El Carmen; no sector da alimentación Frigoríficos de Camariñas; no apartado de internacionalización a coruñesa Grupo Oca-Obras Civiles del Atlántico; en educación Aspronaga e en medio ambiente a Xerencia de Xestión Integrada da Coruña (A Coruña).

---

---

---