En Chandrexa de Queixa acaba de nacer Eurisaces Editora, da man de José Javier González Lamelas (Chandrexa, 1970). A idea xurdiu dun grupo de amigos e compañeiros de Lamelas: «Estabamos interesados na divulgación, no cómic ou no deseño e pensamos que era o momento de dar o paso á editora»
Eurisaces quedou legalizada o pasado 1 de outubro. Van empezar coa publicación de dúas obras: El tiempo y la carne, de Tito Suárez Pérez, ourensán, e 4 ojos, conto ilustrado, de Pablo Otero e Sara Canal. O primeiro sairá na sección Creación e o segundo, na Infantil. A editora ten tres seccións, coa de Ciencia.
«Queremos traballar o libro obxecto, moi coidado. Non nos atemos a ningún territorio, só á calidade da obra. Tampouco ó idioma», sinala González Lamelas. A semana que vén van sacar a revista cultural do mesmo nome, en Internet.
A editora ten en carteira dez títulos para dous anos. Cinco xa están seleccionados. «Queremos deixar un espazo de tempo libre por se aparece algo exquisito, puntual», di José Javier.
Eurisaces emprega servizos externos. Lamelas está convencido de que se un libro é bo, «podes arriscar o que queiras». «En narrativa e prosa poética a calidade é moi deficiente a nivel nacional», apunta Lamelas. Van distribuír en toda Galicia e Salamanca. E van convocar a nivel nacional un premios de ciencia e divulgación. «Haberá todo un ano para escribilo e presentalo na primeira metade do 2014». Na revista colaborarán o teólogo Julio Lamelas; o médico David Simón Lorda, a catedrática de Bioloxía da Universidade de A Coruña, Concepción Herrero e Gerardo Prado, .sociólogo do coñecemento na Universidade de Paraná (Brasil).