«Zouma é un proxecto único para os artistas galegos»

A discográfica ourensá lanza o primeiro traballo de Assembly Point e a segunda obra de Manuel Carballo


ourense / la voz

Carlos Barandela leva toda unha vida vencellado ao mundo da música, primeiro como artista e logo dende unha das empresas máis coñecidas do sector, Ciba Producciones Artísticas. En 1997 diu un paso adiante cando un músico con inquedanzas lle propuxo crear unha discográfica. E así foi como Carlos Barandela e Juan Carlos Fasero decidían, alá polo ano 1997, poñer en marcha unha productora artística e musical: Zouma Récords (Zouma significa muller en barallete). Fasero deixou Zouma para ir á Agadic.

-¿Cambiou moito a cousa dende os grandes concertos de Ciba?

-De forma radical e un pouco por todo: pola crise, pola situación na que se atopan os concellos e por moitas outras cousas. Ciba creouse hai 30 anos e fixemos concertos cos mellores grupos e trouxemos a Ourense o que soaba nos locais máis reputados do panorama musical daqueles anos. Hoxendía iso non é posible e aínda pior, as débedas das administracións van sumando anos e anos.

-¿No caso de Zouma como é a situación?

-Seguimos traballando e aportando novidades ao mercado. De feito Zouma é un proxecto único para os artistas galegos e leva contribuido a crear ou consolidar a carreira de moitos creadores e bandas. Temos un amplo catálogo, que vai de artistas e grupos de sobra coñecidos como Treixadura ou Cristina Pato, a músicos que están sendo dos máis reclamados e contratados, como Anxo Lorenzo, e novas incorporacións.

-¿Riobó é unha desas apostas?

-Begoña Riobó é unha violinista excepcional e que formase o seu propio grupo foi un acontecemento. A banda está funcionando moi ben porque a traxectoria dela, que tocou con Carlos Núñez, Susana Seivane, Lorenzo e outros artistas de sobra coñecidos, é o mellor dos avais. Con todo, agora imos facer unha campaña de promoción.

-Nestes días lanzan os discos de Assembly Point e Carballo.

-Assembly Point é un proxecto multicultural con músicos coñecidos que se integran en diferentes bandas. Un galego, un irlandés e un portugués que fan un son moi fresco na música folc acústica. Carballo da un paso adiante con este segundo disco, presentándose agora como trío.

-¿Funciona o country galego?

-O primeiro disco de Carballo non foi promocionado como se merecía, neste segundo imos apostar forte por el.

carlos barandela director de zouma récords

Conoce nuestra newsletter con toda la actualidad de Ourense

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
1 votos

«Zouma é un proxecto único para os artistas galegos»