O incendio comeza moito antes que o lume
OPINIÓN
Cada verán falamos dos incendios cando xa hai lapas. Porén, a investigación leva anos demostrando que o lume non é só un problema de extinción, senón de xestión do territorio e de gobernanza. O cambio climático incrementa o risco, pero a vulnerabilidade tamén nace do abandono do rural, da fragmentación da propiedade e da falta dunha acción colectiva sostida.
Hai máis dunha década defendíamos que a prevención debía asentarse sobre tres piares: responsabilidade compartida, participación cidadá e cooperación entre administracións, persoas propietarias e comunidades locais. Hoxe esa visión resulta máis necesaria ca nunca.
Por iso ten un especial valor a iniciativa presentada esta fin de semana en Camariñas pola Asociación Forestal de Xestión Conxunta A Croa, entidade sen ánimo de lucro. Máis alá da súa dimensión forestal, representa un modelo de gobernanza que reuniu esta fin de semana á consellería, ao Concello de Camariñas, á Fundación Juana de Vega, a científicos da universidade, ás persoas propietarias, outros axentes sociais e á propia cidadanía arredor dun obxectivo común: coidar o territorio antes de que chegue o lume. Esa suma de vontades demostra que a prevención non depende unicamente dos medios de extinción, senón da capacidade para construír acordos, xerar confianza e asumir unha responsabilidade compartida.
Os grandes incendios do século XXI lembran que non abondan máis recursos para apagar o lume. Precisamos sociedades capaces de xestionar activamente as súas paisaxes. A mellor política forestal comeza moito antes do verán e moito antes da primeira columna de fume. Comeza cando entendemos que protexer o monte é unha tarefa colectiva.