Como todo o mundo está a dar a súa opinión sobre o ocorrido, síntome co dereito para contar o que pensamos naquel momento a miña familia e as persoas da nosa contorna. Adiántolles que a impresión que produciu a aparición do rei na televisión condenando o golpe de Tejero foi que salvara a democracia en España.
Houbo tamén algunhas dúbidas sobre o papel do rei no sucedido no Congreso. Difundíronse informacións, procedentes case todas da familia de Tejero, de que o rei coñecía o golpe e mesmo que o auspiciara, e que había un avión preparado para saír de España por se fallaba.
Agora desclasificouse a documentación relativa ao intento de golpe de Estado do 23 de febreiro de 1981 e para a miña sorpresa volven producirse algunhas dúbidas sobre a súa actuación. Nun artigo no que o autor encomia o papel do monarca na defensa da democracia, deixa caer que o fixo sete horas despois de que Tejero asaltase o Congreso e cando o golpe xa se vía xa fracasado. E noutros artigos dise que a frase que dirixiu o rei a Milans del Bosch —«despois desta mensaxe xa non podo volverme atrás»— significa que antes estivo diante.
Os feitos eran que no congreso Tejero só obedecía a Milans del Bosch, que sacara os tanques ás rúas de Valencia. O xeneral Alfonso Armada estaba empeñado en entrar na Zarzuela para implicar ao rei Juan Carlos no golpe. O rei dixo: «Xuro que nin abdicarei a coroa, nin abandonarei España. Quen se subleve está disposto a provocar, e será responsable diso, unha nova guerra civil. Calquera golpe de Estado non poderá escudarse no rei, é contra o rei». E na madrugada de 1981, vestindo o uniforme de xefe supremo das Forzas Armadas, dixo: «Despois desta mensaxe non podo volverme atrás».
A Casa Real admite que a redacción da mensaxe non foi a mellor. Na miña opinión debeu dicir: «Non me volverei atrás». Así queda máis claro que defendería sempre a legalidade e a democracia.