«Indignación: maiores de 85 dende A Fonsagrada ao HULA para vacinarse»

OPINIÓN

Carlos Castro

02 oct 2022 . Actualizado a las 05:00 h.

Dende A Fonsagrada ao HULA para a vacina

Indignación é o que sentimos a xente da Fonsagrada cando vemos que se chama aos nosos maiores para vacinarse no HULA! Xente que ata agora recibía as vacinas no centro de saúde da vila, resulta que agora non vai recibir alí nin a da gripe.

Son conscientes dende a Consellería de Sanidade do que isto significa? Saben o que significa para moitos dos nosos maiores de 85 anos desprazarse 70 ou 80 quilómetros en taxi para ir a Lugo? Só a nivel económico, saben o que significa iso para unha pensión mensual de 700 euros? E non queda aí a cousa: desprazarse polo propio hospital, facer as correspondentes colas, etcétera. Pero é que non coñecen persoas desa idade? E tan grande a falta de sensibilidade que non son conscientes das dificultades que poden ter? Está claro que non, porque ata se chega ao estremo de citar a persoas que conviven no mesmo domicilio en días diferentes!

Iso sen falar da cantidade de persoas maiores de 85 anos en situación de dependencia. Suponse que xa botan contas de que alguén, coidador ou familiar, as acompañará, faltando ao seu traballo.