Suscríbete 1 año y te regalamos 140 días gratis
Quiero la oferta

Menos economía e máis filosofía

Francisco Castro ESCRITOR E EDITOR

OPINIÓN

SANDRA ALONSO

26 nov 2021 . Actualizado a las 05:00 h.

Todos os gobernos de España, todos sen excepción, os de Felipe González, os de Aznar, os de Zapatero, os de Rajoy e agora o de Sánchez, atacan a materia de Filosofía, anuncian ou ben directamente a súa supresión ou a deixan como optativa para algún dos bacharelatos ou, directamente, case sen horas lectivas. O mesmo acontece cunha das materias que tiñan que ser máis importantes e radicalmente educativas: Ética. Durante anos era alternativa á Relixión (materia que non pinta nada no ensino regrado, para iso están as parroquias e as mesquitas), logo tivo un certo momento de lóxica coa asignatura de Educación para a cidadanía, rapidamente eliminada polo PP en canto chegou ao poder para meter máis horas de relixión.

E coa Lei Celáa, máis do mesmo: a materia de Filosofía queda en nada, e, en troques, o Goberno planta unha nova asignatura: Economía y emprendimento. Como se unha cousa fose contraditoria coa outra, como se aprender a pensar criticamente fose incompatible con emprender o que se queira emprender. É máis, probablemente un emprendería calquera cousa mellor (empresas, a súa decisión electoral, o que sexa) se é quen de pensar correctamente.

A Filosofía naceu ao tempo que a democracia. Este dato é fundamental. E sen filosofía non hai democracia. A ecuación é así de simple. Por iso é máis necesaria ca nunca. Especialmente entre a rapazada, exposta a unhas redes sociais onde navegan libres informacións falsas, bulos ata o aburrimento e a extrema dereita, aproveitándose de todo iso para captar cidadáns acríticos que aceptarán calquera cousa.