O galego do futuro


Desde Carvalho Calero, nunca deixou de estar no horizonte do galego admitir as regras ortográficas portuguesas, polo menos opcionalmente. Por que motivo? Primeiro, é preciso esclarecer que esta reforma só se plasmará na escrita, mesmo que incentive na fala formas de sabor antigo como canzón. Teremos Carvalho por Carballo, pronunciado igual, só que multiplicando o seu potencial comunicativo, dado que nos servirá para comunicar entre nós e países como Portugal ou Brasil.

Contra isto ouvimos principalmente dous argumentos. O primeiro é que esta troca dificilmente vai parar a perda de falantes. É verdade, ao menos prontamente. No entanto, o idioma poderá adquirir suficiente valor pragmático para deixar de ser promovido exclusivamente por motivos sentimentais e principiar a ser valorizado como ferramenta útil.

O segundo é que entre nós continuaremos preferindo o idioma de Cervantes ao de Rosalía, mesmo que este se una ao de Camões, menos empregado no mundo que o primeiro. Isto é verdade se pretendemos competir de forma suicida, só que a proposta de Carvalho proporciona potentes motivos para transmitir pacificamente ambos idiomas, e contra o que tanto se pregoa -«el gallego no sirve fuera de Galicia», diremos: «Podemos usar os dous para chegar a universos idiomáticos diferentes».

O carballo segue sendo emblemático para nós, só que nos círculos comerciais agora metemos o roble para falar da madeira. Conscientes de que a frase «madeira de roble» é entendida por todo o mundo, iremos deixando de usar carballo, como aconteceu antes a estrada (carretera) ou a pescada (merluza). Para reanimar estes termos é preciso ampliar o seu campo comunicativo. O uso do galego seguramente continuará igual a curto prazo, só que a mocidade terá poderosos motivos para se vincular ao galego no futuro. Da mesma maneira que dar utilidade ao monte é a única forma eficaz de evitar as queimas, dar utilidade ao idioma será o modo de evitar o seu esmorecemento.

Por Eduardo Maragoto Presidente da Associaçom Galega da Língua

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
11 votos
Comentarios

O galego do futuro