Chamábase Eleazar Blandón, tiña 42 anos era nicaraguano e veu a España a morrer…, desculpen, quixen dicir que veu traballar nunhas condicións que provocaron a súa morte. Sucedeu hai uns días en Lorca. Deixárono abandonado ás portas do centro de saúde, inconsciente, e morreu cando tentaron reanimalo.
Yolanda Díaz, ministra de traballo, tras investigacións abertas pola súa morte, confirma que faleceu «por tensión térmica» tras traballar en dobre xornada, mañá e tarde recollendo froita «a máis de 44 grados sen ningún tipo de protección». A irmá do falecido di que lle pagaban 4 euros a hora, sen contrato, que non lle daban nin auga para beber e que o xefe lles dicía «sodes moi lentos, non servides para nada», e que mesmo cando estaba tirado no chan traballando arroxáballe po á cara cos seus pés. O seu xefe é un ecuatoriano, de 50 anos, que foi detido pola Garda Civil por indicios de delito contra os dereitos dos traballadores e que foi posto en liberdade sen fianza ao día seguinte. O seu avogado di que o seu único delito é administrativo: non dalo de alta na Seguridade Social.
Nalgunhas noticias de prensa aparece como propietario dunha empresa encargada de contratar xornaleiros para a explotación agrícola. O de explotación está clarísimo; en canto ao de empresario… Creo que nalgún momento tamén se considerou así aos negreiros.