Humildade, afouteza, intelixencia e sensibilidade


Galicia debe fuxir dunha concepción rexional que a sitúe como mero brazo administrativo do Estado nas políticas de gasto para converterse nun polo de competitividade global. A perda de peso do sector industrial reflicte o contrario.

Os cidadáns esíxenlle ao Goberno que aposte por sectores e empresas, ben para «seleccionar gañadores» ou «salvar perdedores». Aínda que probablemente esta política é a que menos conflitos xera ao repartir o apoio público entre moitos grupos de presión, a verdade é que non nos está a levar moi lonxe. A política industrial require humildade, afouteza, intelixencia e sensibilidade.

Require humildade porque, en contraste coa facilidade con que todos escollemos empresas e sectores «de futuro» na barra dunha cafetería, de feito é un exercicio complexo. Se fose polos cartos que moitos países teñen investido en «sectores gañadores», o mundo estaría cheo de Silicon Valleys. O Goberno debe levar o timón; deixemos que os axentes económicos e sociais remen.

A política industrial require tamén de afouteza, porque é necesario abstraerse das presións de distintos lobbies que, baixo a escusa da transformación estrutural (transvase do emprego cara actividades novas), en realidade so procuran influír para beneficiar os seus propios intereses. Os nosos sectores e empresas loitan por denominarse «estratéxicos» en todos os plans e informes porque saben o que está en xogo no marco actual.

Terceiro: a política industrial require intelixencia para acompañar as iniciativas de cambio estrutural con reformas institucionais que configuren unhas «regras de xogo» estables e eficientes en ámbitos como a formación, o financiamento, os trámites burocráticos, o funcionamento do mercado de emprendedores e directivos, os pactos sociais... Estas «regras de xogo» son clave (observemos o Norte de Portugal) para rachar coas barreiras ao crecemento e estimular a produtividade.

Por último, nin a humildade, nin a afouteza, nin a intelixencia son moi útiles se os deseñadores de políticas públicas esquecen a sensibilidade necesaria para responder a uns cidadáns que non desexan exactamente unha Industria 4.0, senón sobre todo unha Sociedade 5.0 inclusiva e medioambientalmente responsable. Confundir os fins cos medios impide observar que as nosas capacidades configuran un modelo industrial ideal para alcanzar os resultados que estamos alcanzando. Se os axentes económicos e sociais galegos desexan mellores resultados, non é suficiente con espremer máis o mesmo modelo.

Por Xosé H. Vázquez Catedrático de Organización de Empresas. ECOBAS Universidade de Vigo.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Tags
Comentarios

Humildade, afouteza, intelixencia e sensibilidade