A demagoxia verde


A semana pasada a noticia foi o cumio do clima da ONU en Madrid, que aínda segue, pero esta semana a noticia será o mundial de clubs de fútbol en Qatar. Que une unha cousa e maila outra? Pois a proposta do presidente do Real Madrid de crear unha liga mundial de clubs. Que o señor Florentino Pérez queira pasar á historia pola porta grande non é cousa nova, pero a porta que escolleu, máis que grande, é megalómana. Un desafío global que permitiría acaparar dereitos de emisión mundiais e darlle outra dimensión ao negocio. Tamén suporía relegar as ligas estatais a unha segunda división, e mesmo abandonar á Euroliga aos segundóns. Para iso necesita convencer aos donos dos grandes equipos. O que se propón é unha conquista do mundo polo fútbol español no século XXI, protagonizada polo Real Madrid, ao xeito de como nos anos sesenta conquistara Europa.

A tal liga mundial de fútbol sería algo así como unha fórmula 1 con todo o seu circo e desprazamentos incluídos, pero en fútbol. Discútese moito sobre o asunto: se os ingleses estarán dispostos, se os alemáns entrarán ou que dirán as federacións nacionais, estatais e continentais. Se pesarán máis as identidades nacionais e os públicos tradicionais ou o empeño transnacional que destila a idea de Florentino Pérez. A proposta e a súa discusión coinciden exactamente co cumio do clima de Madrid e escríbese moito a conta dela sobre a demagoxia duns e o negacionismo doutros. Para o meu ver, a maior demagoxia destes días deuna o dono deste equipo de fútbol. Mentres todos debaten sobre a emerxencia climática, o quecemento global e as formas públicas e privadas de tomar conciencia e medidas que sexan efectivas, outros fan negocio verde. O asunto non é novo, pero nesta altura chegou a niveis de insulto da intelixencia. Bótase de menos escoitar voces expertas -deportivas ou científicas- que cuestionen isto por razóns ambientais.

O que se propón con esta liga mundial é unha contribución considerable ao acrecentamento da contaminación e do quecemento global: vinte clubs de fútbol desprazándose todas as semanas polo mundo adiante, duns continentes a outros, acompañados dunha corte de seareiros privilexiados de alto standing, que previsiblemente se irá facendo cada vez máis grande.

Paradoxalmente esta proposta amosa que non é certo que os poderosos non tomen conciencia sobre a emerxencia climática ou que a neguen, contra as evidencias científicas. A esa toma de conciencia parece responder precisamente unha proposta coma esta. Como afirma un colega experto, os máis poderosos están a acaparar os recursos globais de modo exclusivo, especialmente os ambientais. Tamén os recursos do fútbol. Mentres Greta Thunberg está a pór de moda entre os adolescentes a renuncia a desprazarse en avión polo seu alto poder contaminante, outros van na dirección contraria pero con argumentos populares. Iso si, o equipo do presidente Florentino contribuíu decisivamente ao cumio do clima e á concienciación ambiental, facendo que por primeira vez o seu equipo vestira de verde no partido da semana pasada. Como manda o novo deus ambiental, e para escarnio dos afeccionados do Racing de Ferrol e dos futuros parados de Endesa.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
13 votos
Comentarios

A demagoxia verde