As ilusións do sexo


Sempre desconfiei das enquisas, sobre todo daquelas relacionadas coa intimidade. Para sermos francos, nas respostas tamén precisamos de certa intimidade e anonimato. Cando alguén nos pregunta en directo, o máis normal é finxir e encher o peito de vaidade para soltarmos non o que é, senón o que nos gustaría que fose. Por iso, unha vez máis, leo con certa prudencia os resultados que a empresa Control tirou da mocidade española sobre o tema da práctica sexual, onde galegas e galegos ocupamos un sétimo posto no total do Estado. 

Coido que, máis que a posición acadada por mor da frecuencia con que o facemos, o que nos debería preocupar é a calidade, a forma, a imaxinación e, por suposto, a caída no uso do preservativo. Lendo a fondo a enquisa é doado chegarmos á conclusión de que o patrón falocéntrico da pornografía segue a rexer as posturas e a fantasía da mocidade. Aí é onde coido que debe intervir unha boa educación para construír o sexo coma un lugar de pracer e respecto, en contraste tamén coa sacralización que as relixións fan do asunto. Con todo, como estamos a falar da intimidade dos máis mozos, podemos falar apenas de tendencias. Pero se falamos do sexo na terceira idade, malia que moita xente aínda pense que a eses anos o sexo non pode ser máis ca unha ilusión, non hai moito que a prensa recollía unha enquisa sobre a práctica sexual das persoas entre os 65 e os 75 anos. E o curioso é que os datos tirados desa enquisa si estaban para botar foguetes, porque nesa franxa de idade seica se fai dúas ou tres veces por semana. Algo insólito que levou a un meu amigo, que adoita tomar en serio todo o que sae no xornal, a recortar a noticia e pegala na porta do frigorífico, agardando por esa xubilación tan desexada.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
21 votos
Comentarios

As ilusións do sexo