A Real Academia Galega de Ciencias


O artigo de opinión publicado o 11 de xullo polo profesor Jaime Gómez Márquez dáme pé para seguir informando á sociedade sobre a razón de ser da Real Academia Galega de Ciencias (RAGC). Aínda que o intentamos, temos moitas dificultades en transmitir os nosos obxectivos e actividades, mesmo aos nosos colegas científicos. A misión da RAGC é «promover a ciencia e a tecnoloxía e a súa influencia na sociedade, difundindo a cultura e os valores científicos, creando opinión dende a independencia, para contribuír ao desenvolvemento social e económico de Galicia». Nin máis nin menos. Moi ambicioso, pero coa ilusión de facelo realizable, contando con recursos moi limitados pero co entusiasta e desinteresado labor dos académicos. Para lograr este obxectivo actuamos e comunicámonos coa sociedade civil, a científica, a educativa e a político-administrativa con ideas, accións e discursos específicos.

Temos deseñado ciclos de conferencias divulgativas a impartir nas sete cidades galegas, ademais dos xa tradicionais cursos especializados en temas á vangarda da ciencia e a tecnoloxía, impartidos dende hai máis de 20 anos en Santiago e Lugo, e que pretendemos estender a outras cidades galegas. É importante salientar que neste ano os académicos e as académicas impartirán máis de medio cento de conferencias de divulgación en centros de ensino e que a exposición «Científicos Galegos» percorrerá ata dez institutos e colexios en Galicia.

Ben recentemente temos entregado os premios da sexta edición de Contar a Ciencia a catro brillantes estudantes de Xornalismo e Ciencias da Comunicación, tratando de estimular o seu interese polo ámbito científico, e en novembro entregaranse os premios Galicia de Xornalismo Científico na súa cuarta edición, incentivando así a difusión da ciencia nos medios de comunicación. Dende hai once anos a RAGC promove o Día da Ciencia en Galicia, a celebrar o 8 de outubro, data de nacemento do Padre Feijoo. Este ano estará dedicado a Tomás Batuecas, presidente da Comisión Internacional de Pesos Atómicos entre os anos 1960 e 1963, o que resulta indicativo do seu nivel internacional. Foi o único español que presidiu esta comisión da IUPAC nos 120 anos de historia desta institución. Neste contorno organizarase una exposición sobre química e sociedade no pazo de Fonseca da USC, e posteriormente na Coruña e Vigo, tratando de informar á sociedade sobre o impacto decisivo da ciencia e a tecnoloxía sobre os cidadáns.

Para recoñecer o traballo das científicas e os científicos deseñamos dous programas. Un, que chega á súa duodécima edición e que valora traballos científicos de investigadores mozos e consolidados mediante os premios Ernesto Viéitez; e, este ano, unha nova iniciativa pola que se concederán as Medallas de Investigación da RAGC ás traxectorias de cinco científicas e científicos, nos cinco ámbitos da academia: Bioloxía-Ciencias da Saúde, Ciencias Económicas e Sociais, Ciencias Tecnolóxicas, Matemáticas-Física- Ciencias da Computación e Química-Xeoloxía.

Pretendemos estimular e recoñecer, mediante os premios Francisco Guitián, Fernando Calvet e Ramón Bescansa, a transferencia de resultados de grupos de investigación a empresas innovadoras, pero tamén ás empresas que desenvolvan de forma efectiva estes resultados, que, ademais do indubidable interese científico, contribuirán a mellorar o desenvolvemento económico da sociedade galega.

E adianto un acordo atinxido entre a RAGC e o Parlamento de Galicia polo que os académicos se brindan a asesorar os parlamentarios en temas de ciencia e tecnoloxía, tratando así de contribuír á mellor toma de decisións políticas. Proximamente darase cumprida información pública sobre este acordo. Asemade temos cursado este ofrecemento a outras institucións da Administración pública galega. A RAGC vaise renovando progresivamente (18 dos 33 actuais académicos incorporámonos nos últimos 5 anos) e, asemade, este ano proporanse «académicos correspondentes» nas cinco seccións da RAGC, tratando de ampliar perfís de ámbitos de coñecemento e procurando incrementar a nosa (limitada) capacidade de acción.

O traballo da RAGC non sería posible sen o apoio externo de moitas entidades, tanto públicas como privadas. Neste sentido, permítome agradecer a colaboración da Axencia Galega de Innovación, do Consello da Cultura Galega, da Secretaría Xeral de Universidades, da Universidade de Santiago, das deputacións de Lugo e A Coruña, das fundacións Barrié e La Caixa e da Confederación de Empresarios de Galicia. Seguiremos traballando para ampliarmos a nosa rede de colaboradores e potenciar novas actividades pola ciencia e a tecnoloxía galega. Tan convencidos estamos de que somos útiles para atinxir unha sociedade máis culta e lograr a través da ciencia e a tecnoloxía un maior e mellor progreso social e económico como de que debemos ser moitos traballando acotío neste cometido. Nós faremos a nosa parte!

Por Juan M. Lema Rodicio Presidente da Real Academia Galega de Ciencias (RAGC)

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
4 votos
Comentarios

A Real Academia Galega de Ciencias