Xestionar os riscos, salvagardar o herdado


Ningún monumento en ningún lugar do mundo está completamente libre de ser asolado como foi esta semana Notre Dame de París. Estamos a falar dun dos principais tesouros da humanidade, dunha catedral inspiradora de infinidade de obras literarias e artísticas, de Víctor Hugo a Brassaï, sita nun dos países cunha maior conciencia patrimonial e cunhas técnicas avanzadas en canto á protección do seu patrimonio construído.

En todo caso, hai que aprender desta terrible lección e non baixar a garda na xestión do noso patrimonio construído. Galicia está en boa disposición para facelo. Desde o pasado 2016, a nosa comunidade conta cunha nova Lei de Patrimonio, que incorpora as principais medidas de carácter técnico para a salvagarda dos bens no marco legal internacional durante estas últimas décadas, e desenvolve ademais un preciso catálogo de intervencións e medidas concretas previstas para a conservación dos valores culturais de cada tipo de ben.

A maiores, desde a Consellería de Cultura e Turismo estamos a traballar para que a meirande parte dos edificios e monumentos sobranceiros conten con plans de conservación específicos, que teñen por finalidade guiar as intervencións de mantemento, conservación, consolidación e rehabilitación, entre outros aspectos. Este é un bo punto de partida para xestionar o noso patrimonio. Unha xestión que debe contar coa participación activa e comprometida dos propietarios, usuarios e responsables dos bens, mais tamén de toda a sociedade, pois o patrimonio histórico é o herdo da colectividade e é así, coa achega de todos, cadaquén desde as súas responsabilidades, como poderemos cumprir coas xeracións vindeiras.

Neste momento, o que queda é aprender da desgraciada experiencia sufrida en París e da actividade e práctica restauradora que, sen dúbida, agora van iniciar os responsables do patrimonio cultural galo e amosar a solidariedade de Galicia co pobo francés para que a reconstrución de Notre Dame restitúa e salvagarde os maiores valores culturais e patrimoniais posibles desta xoia do gótico europeo. Unha reconstrución ante a que hai que amosar esperanza polo carácter perito do pobo francés na xestión do seu patrimonio. Oxalá o legado que representa Notre Dame, froito do coñecemento construtivo de séculos ao longo e ancho de Europa, rexurda co esplendor de antano.

Por María del Carmen Martínez Insua Directora xeral de Patrimonio Cultural da Xunta

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Xestionar os riscos, salvagardar o herdado