Quen vén sendo a extrema dereita?


Un amable lector mandoume un correo preguntándome por que identificaba coa extrema dereita o novo partido que vén de aparecer nas eleccións andaluzas. Agradecinlle a pregunta, despois da estrañeza inicial, porque nada hai máis democrático que razoar, debater e persuadir. Esa pregunta obriga a non dar nada por sentado, un erro que adoito cometemos cando temos que distinguir a realidade da aparencia: esixe pensar canto hai de novo e canto de vello nas mensaxes e nas propostas políticas, ou cales son as axendas ocultas; identificar os odres vellos con viño novo; distinguir qué está a nacer e qué non acaba de morrer.

Pensando historicamente o presente, sen partir dunha posición partidista da que carezo, e tendo en conta o espazo dun breve artigo, sintetizo esquematicamente algúns argumentos para explicar por que debe definirse como extrema dereita ao novo grupo do Parlamento de Andalucía que apoia o Goberno do PP e C’s. 1) Porque na topografía política tradicional sitúase á dereita dun PP que ata agora mesmo, e por 25 anos, reuniu toda a dereita española no que Fraga denominou a «maioría natural». De aí saen estes novos dirixentes que só teñen á súa dereita o nazismo de Hogar Español e a decrépita Falanxe do abade do Val dos Caídos. 2) Polos referentes europeos que escollen de aliados e porque así é como os ven en Europa, e esa será tamén a súa posición no actual mapa político europeo da emerxente extrema dereita. 3) Polas súas referencias programáticas, en liña coas outras extremas dereitas globais, e aforro presentar os seus contidos, que son coñecidos e simples e non precisan publicidade.

4) O seu empeño na transversalidade política a morte agocha a ansia de anular as diferenzas políticas entre españois, ata o punto de que non conciben máis que unha forma de ser e pensarse español; xa que logo, coma en toda proposta totalitaria, sobran os demais partidos, identificados como «políticos» en expresión tan popular como antigamente franquista. Porque 5) a súa interpretación de asuntos constitucionais chave ?autonomía, democracia liberal, Exército...? correspóndense exactamente coa da extrema dereita española na Transición. Vén sendo o programa actualizado de Fuerza Nueva e nada neles pode considerarse comprensivo co pacto constitucional, nin co actual Estado de benestar. A Constitución é o contrario do que reclaman. Pero a mellor forma de entender onde queren ir apréciase 6) na súa visión negacionista do pasado sobre a Ditadura, a guerra e as matanzas golpistas. Por último, conscientemente ou non 7) responden á cultura política e á ideoloxía máis tipicamente franquista que os historiadores investigamos e explicamos, instalada na sociedade española en 40 anos de poder e evolución. Todo presentado con formas, caras, nomes e cores novas, mesmo reclamándose defensores da verdadeira liberdade e a verdadeira democracia, coma en Austria ou Suecia. En 1977 La Gaya Ciencia editou uns libriños titulados Que é? dirixidos a unha sociedade ansiosa por saber. Haro Tecglen escribiu o titulado Que é unha ditadura? J. R. Pin escribiu Que é a extrema dereita? Abonda relelos para situarse.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
27 votos
Comentarios

Quen vén sendo a extrema dereita?