Todos os medios informativos reproducen as palabras do asasino de Laura Luelmo: «Por favor, déixenme encerrado toda a vida, non me deixen saír máis porque volvereino facer». Algúns mesmo as cualifican de «conmovedora confesión».
Seguro que coñecen a historia do tolo que matou a unha nena e ao que, tras vinte anos encerrado nun manicomio cunha conduta exemplar, un doutor decide deixar en liberdade. O tolo non quere saír, porque alí -di- séntese seguro, aquela residencia é xa a súa casa, e gústalle o traballo de xardineiro que fai. O médico insiste: algo haberá que lle apeteza facer fóra do manicomio. O tolo asente, algo si que hai… Sae e mata á primeira nena que se cruza con el. O asasino do que falamos non é un tolo. É responsable dos seus actos, que son consecuencia dun temperamento violento e da carencia dunha educación que o afixera a dominar os seus instintos.
Segundo un estudo da Oficina das Nacións Unidas contra a Droga e o Delito, publicado en 2014, o 95 % dos homicidios a nivel global son cometidos por homes. Iso non significa que sexan «os malos» da sociedade. Matan máis porque poden facelo: son máis fortes e educáronos para exercitar a súa forza, en todos os sentidos.
Repito unha vez máis: só a educación recibida na familia e na escola e prolongada ao longo de toda a vida pode conducirnos a unha sociedade paritaria e pacífica. Utopía? Quizais. Pero é o momento de desexarlles a todos vostedes un feliz 2019 e que poidan vela realizada.