Galiza merece máis


Sería alentador pensar que os orzamentos do PP van solucionar o paro, a precariedade, as listaxes de espera, a fenda salarial ou atender as persoas dependentes, mais a realidade é ben diferente e a propaganda non arranxa os problemas deste país.

Os orzamentos insisten nun modelo fracasado e non van mellorar os servizos públicos, nin sentar as bases dun novo modelo produtivo -autocentrado, innovador e sustentábel- que cree emprego estábel con salarios decentes. Son o espello dun Goberno esgotado, rutineiro e sen proxecto de futuro. O Goberno de Feijoo non deixa unha herdanza de prosperidade, deixa unha Galiza máis endebedada, con menos emprego e máis precariedade, cos salarios e as pensións máis baixas do Estado e cunha xeración perdida na emigración.

Temos uns orzamentos lastrados por un financiamento inxusto, mais Feijoo, en lugar de defender un concerto económico que nos daría máis recursos, teima en defender o mesmo esquema centralista. E o máis grave, usa a escuálida capacidade fiscal para facerlle agasallos aos ricos, mentres o común dos galegos e das galegas non notarán as anunciadas rebaixas de impostos. Iso si, seguiremos vendo como se deterioran os servizos públicos. Confunde política social con cemento. Sen recuperar e ampliar o profesorado e o persoal médico expulsado polos recortes, non avanzaremos cara a un estado do benestar forte.

A principal preocupación dos galegos e das galegas é o emprego, pero nestes orzamentos non hai un plan para industrializar a base produtiva, pechar ciclos e xerar valor engadido, nin unha aposta pola I+D+i, -Feijoo situounos á cola da innovación-, nin pola economía circular.

O proxecto estrela é o Xacobeo 2021. Como se un país co potencial en coñecemento, no agro, no monte, na pesca, na robótica ou na produción enerxética tivese que resignarse a un turismo de baixo custo.

Falta confianza en Galiza e visión de futuro, con propostas como unha tarifa eléctrica galega que nos permita usar os nosos recursos, para evitar peches como o que ameaza a Alcoa.

Falta valentía e proxecto de país. Galiza merece máis. Moito máis.

Por Ana Pontón Voceira nacional do BNG

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
31 votos
Comentarios

Galiza merece máis