Rodríguez Pardo, socialismo e galeguismo


Co pasamento de Xosé Luís Rodríguez Pardo vaise unha das figuras senlleiras da construción do marco institucional no que Galicia vive na actual etapa democrática. A Galicia do Estatuto, do autogoberno. Xosé Luís foi o primeiro secretario xeral dos socialistas galegos no PSdeG, e un daqueles socialistas que permitiron a configuración do compoñente galeguista do partido. Cofundador do PSG, formación na que compartiu con Laxe, Ceferino, Beiras e Xaime Barreiro, entre outros, os seus compromisos con Galicia, Rodríguez Pardo optou pola súa incorporación a un PSOE que marcou a súa singularidade galeguista a través do PSdeG, no que se fundiu o legado galeguista coa tradición socialista dunha forza de esquerdas e comprometida.

Esa mestura de socialismo e galeguismo pulou con forza na redacción e aprobación do Estatuto de Autonomía que permitiu superar a aldraxe e situar a Galicia en pé de igualdade coas outras nacionalidades históricas. Reflectía, en definitiva, un país que non estaba disposto a asumir unha rebaixa dos seus niveis de autogoberno e de competencias, e conseguiu acadar unha consideración singular e digna para o autogoberno de Galicia. Precisamente socialismo e galeguismo foron os dous compoñentes clave que imbuíron a traxectoria política de Xosé Luís Rodríguez Pardo.

Home de ideas e de reflexión, comprometido politicamente en momentos difíciles, mantivo unha longa traxectoria de compañeirismo cos socialistas galegos. Tanto é así que aínda a semana pasada, na Coruña, trasladoume o seu apoio e o seu ánimo para o partido que seguirá sendo a súa casa e para a nova etapa do socialismo galego.

En paralelo, a tradición galeguista hoxe asumida no PSdeG ten en Xosé Luís un dos seus referentes. A do galeguismo entendido como sentimento e compromiso co país, que ten permitido impulsar os intereses de Galicia dende o eido político e o civil e que foi quen de marcar axendas de progreso para o país nos gobernos presididos por Fernando González Laxe e Emilio Pérez Touriño.

Xunto ás responsabilidades orgánicas que desempeñou no partido, e á súa traxectoria como deputado en Cortes e membro da Comisión dos 16 que elaborou o Estatuto de Autonomía de 1981, Rodríguez Pardo mantivo unha liña de compromiso político coa emigración, especialmente na súa etapa como senador e vicepresidente do Senado, chegando a presidir o Consello Xeral da Emigración do Estado. Anteriormente, ocupou un escano no Parlamento de Galicia.

Socialista e galeguista comprometido, o seu legado permanecerá no noso traballo. Porque, como escribiu o Premio Nobel François Mauriac, a morte non nos rouba os seres queridos, senón ao contrario, gárdaos e inmortalízaos no noso recordo.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
6 votos
Comentarios

Rodríguez Pardo, socialismo e galeguismo