Haberá ou non haberá? «That is the question», como diría o príncipe Hamlet. Mariano Rajoy afirmou categóricamente que non haberá referendo sobre a independencia. Carles Puigdemont, tempo atrás, dicía que daría todos os pasos necesarios para que os cataláns puidesen expresar libremente a súa vontade nas urnas.
Agora, a contundencia rajoniana levoulle a prescindir de circunloquios e afirma non menos categóricamente que si haberá referendo. Quen dos dous conseguirá pasar das palabras ás obras? Ningún o ten fácil.
Mariano Rajoy terá que ordenar aos Mossos d’Esquadra que impidan a promoción, organización e celebración do evento, requisando urnas, papeletas e todo o demais.
E se os mossos ou polo menos algúns se declaran en rebeldia? Pois entón terá que recorrer á Guardia Civil ou ao Exército. Vaia batifondo!
Pola súa banda, Carles Puigdemont e os seus teñen que ter un plan B, algo así como: «Que me quitas unha urna, pois poño outra»; «que requisaron as papeletas oficiais, pois te amolas porque temos máis».
Por poucas urnas que consigan colocar serán suficientes para poder proclamar solemnemente a República Independente de Cataluña.
Visto o visto estes días no Parlament, podería ser. Despois probablemente algún irá ao cárcere, pero non por malversación de fondos senón como un heroe da independencia catalana.
E entón volveremos falar de solucións políticas e da necesidade de diálogo.
Ou sexa, volta a empezar, e oxalá que comece con mellor pé.