Falacias que me toman por parva


O gasto de convocar eleccións por segunda vez é o peor que nos pode pasar (non son parva: o peor que nos pode pasar é pensar que a democracia é un gasto). Os cidadáns queren caras novas na política (non son parva: os cidadáns queremos simples políticos, non títeres irresponsábeis e preguiceiros apoltronados nas súas cadeiras). Hai que deixar entrar a xente nova na política (non son parva: a idiotez humana non está reñida coa idade). Os novos partidos representan unha política nova (non son parva: se fixesen unha política nova, non habería que repetir as eleccións e gastar nelas). O problema do nacionalismo galego é que está dividido (non son parva: en realidade nunca estivo verdadeiramente unido). A cidadanía galega quere partidos que se preocupen verdadeiramente por Galicia en Madrid (Non son parva: se os cidadáns quixesen iso non votarían como votan nas eleccións xerais nin nas autonómicas e municipais). O PSdeG está acabado (non son parva: xa estaba acabado cando moitos pensaban que estaba empezado). O PP está debilitado pola corrupción (non son parva: ao PP só o debilita o aumento dos tipos de interese, cando deixan de votalo os mesmos que botan as mans á cabeza porque os políticos son corruptos pero, en canto poden, relean o IVE das facturas ou non pagan a Seguridade Social da súa empregada de fogar). ¡É a gran oportunidade da esquerda verdadeira, reconstituída, futurible! (Non son parva: España é de charanga e pandeireta desde os anos 30, e Galicia é o que é desde tempos inmemoriais, a pesar da súa esquerda moralmente perfecta e politicamente superior que aspira a mudar o mundo sen contar co mundo). Aínda así, irei votar.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
26 votos

Falacias que me toman por parva