Foi o nome en clave dun plan golpista ideado polo tenente coronel da Garda Civil Antonio Tejero e o capitán da policía armada Ricardo Sáenz de Ynestrillas, que o 11 de novembro de 1978 se reuniron con outros dous oficiais en Madrid, na cafetería Galaxia. Aínda que se cualificou de «cousa de tolos», o plan para impedir o referendo da Constitución estaba ben urdido.
Tería lugar o 17 de novembro porque habería exercicios de tiro na Agrupación de Destinos da Garda Civil, e Tejero disporía de homes para entrar na Moncloa e deter ao Goberno. Ademais, o rei estaría en México, Gutiérrez Mellado en Cartaxena, e en Madrid coincidirían moitos militantes e simpatizantes de extrema dereita polo próximo aniversario das mortes de Franco e José Antonio Primo de Rivera.
O golpe fracasou pola denuncia dun militar, e Tejero e Ynestrillas foron xulgados e condenados ás penas mínimas: sete e seis meses de prisión.
No Congreso dos Deputados, Manuel Fraga Iribarne culpou ao Goberno da intentona: «La intervención de Gutiérrez Mellado fue una falta de respeto al Parlamento. Responsabilizo al Gobierno y al ministro de Defensa de lo que pasó. El ministro está dividiendo al Ejército. Esta es una cámara del Este, por eso quienes más aplauden son Carrillo y su gente».