«O sector está inmaduro, pero evoluciona a pasos de xigante»

F. Fernández REDACCIÓN / LA VOZ

MERCADOS

MARCOS MIGUEZ

A empresaria dirixe a planta que máis pellets produce en España, situada nas Pontes. É unha das catro que se dedican en Galicia a un negocio aínda non consolidado, pero que deixou atrás os malos momentos e que empeza a despuntar grazas á recuperación do consumo. Pardo resalta que os incentivos da Xunta para instalar caldeiras de biomasa en fogares e industrias son esenciais para o despegue do sector

07 oct 2018 . Actualizado a las 04:45 h.

Luz Pardo Longueira (A Coruña, 1968) dirixe a fábrica que máis pellets produce en España, Biomasa Forestal, nas Pontes, que emprega a 28 operarios, factura dez millóns e da que este ano sairán 70.000 toneladas. A metade irá á exportación. Pardo preside ademais a Asociación Española de Productores de Pellets (Apropellets).

-Canto desaproveita Galicia a súa biomasa forestal?

-Dende logo poderíase aproveitar moito máis, si, pero xa saberá que a Xunta ten un plan de fomento da biomasa con incentivos para a instalación de caldeiras en edificios públicos e fogares que está contribuíndo ao despegue do sector.

-Por que non se desenvolveu antes?

-É un combustible de proximidade, barato e cun prezo estable, que acostuma subir o mesmo que o IPC. Pero hai tres ou catro anos houbo un parón importante porque caeron moito os prezos dos combustibles fósiles, pero estase recuperando o consumo.