Tomás Fajardo: «Se soubera que con irme se acabarían os problemas, sacaríame do medio»

O presidente da Federación Galega de Confrarías fixo unha chamada á unión para afrontar un momento difícil para o sector


Redacción / La Voz

Fronte aos que xa lle chaman «señor Loctite», Fajardo replica que non é apego ao cargo o que lle move: «Se soubera que con irme eu se solucionarían os problemas, gustosamente me sacaría do medio». Pero está convencido de que non é así. Que as críticas á súa xestión veñen do momento conxuntural, moi difícil para o sector, e por axentes interesados en facer ver que el se move por motivos políticos.

-¿Haille que dar parabéns?

-Estes procesos non son agradables e o feito de que unha federación provincial solicite a dimisión, non é como para recibir parabéns. Pero ante esa petición, eu decidín someterme voluntariamente a unha cuestión de confianza, que non está recollida nos estatutos, que só prevén a moción de censura, pero dándolle as condicións de esta: é dicir, que pediran a dimisión 3/5 do censo. Como non se acadou, considero que superei o proceso e sigo no cargo.

-De todos os xeitos é importante o número de xente que non o apoia e aposta pola súa saída.

-Non hai que ler os resultados como se foran unhas eleccións. Cando se quere botar ao presidente da federación se require unha maioría cualificada e non se deu. Tampouco foi unha hecatombe.

-¿Este proceso vai traer consigo un cambio no xeito de presidir a federación?

-Hai que reflexionar sobre o acontecido e quizá reconducir a situación e facer un chamamento á unidade, en vez de buscar a división, para defender os intereses xerais do sector. Temos que ir unidos e con unha sola voz. Tamén é certo que o momento conxuntural non é fácil.

-Vostede mesmo admitiu que cometeu erros.

-Recoñézoo e xa pedín desculpas por ese acordo que decidín pospoñer. Pero tampouco o fixen tan estrepitosamente mal. Hai circunstancias que xogan na miña contra.

-¿Por exemplo?

-A crise do cerco, quizais non estiven á altura, como din; a lei de acuicultura, que a federación sempre rexeitou... Detrás de todo isto está o momento político e hai axentes interesados en presentarme como inclinado hacia un partido político e enfocar a miña xestión dende aí. Tampouco explicaron detalladamente por que se pedía a miña dimisión, como se ten que facer nunha moción de censura.

-¿Cre que vai ser fácil traballar a partir de agora?

-Non vai ser fácil, entendo, pero xa dixen que non ía dimitir. Vou seguir no cargo, loitando polo ben do sector e facelo o mellor posible. Empecei con ilusión e sígoa mantendo, aínda que situacións coma estas supoñen un bache no camiño. Imos intentar unir e unificar, porque o sector está nun momento no que non pode permitirse as divisións.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Tomás Fajardo: «Se soubera que con irme se acabarían os problemas, sacaríame do medio»