Luis López Pombo: «Camilo José Cela nunca coñeceu a casa, aínda que o intentou»


lugo / la voz

ohistoriador lucense Luis López Pombo foi o que confirmou as orixes dos antepasados de Camilo José Cela en Triacastela tras levar a cabo unha minuciosa investigación que rematou cando lle presentou os datos a un dos irmáns do Nobel, José Luis Cela, cando residía en Compostela.

-¿Como se produciu o descubrimento?

-Estaba preparando o libro Hidalgo y Casas Señoriales de As Nogais, Pedrafita e Triacastela e cando vin a de Meizarán o seu dono, Santiago Fontal, díxome que era a casa onde nacera o avó de Camilo José Cela. Decidín entón poñerme a investigalo ata descubrir que fora o seu bisavó.

-¿Escoitara algunha vez esta posibilidade?

-Algo escoitara cando lle deron o premio Nobel no ano 1989 e o avogado lucense Manuel Eugenio escribiu que a casa onde nacera o seu avó estaba en Lugo.

-¿Camilo José Cela visitou a vivenda?

-Chegouse a pensar que viñera unha vez coa súa dona. A realidade é que quixo vir e que un día que almorzou no Hostal Fonfría nas Nogais preguntou por onde tiña que ir a Meizarán. Ao final meteuse por Nullán e ao non atopar a casa con facilidade desistiu.

-¿Contou coa axuda da familia na súa investigación?

-É complicado contactar cos Cela e cando preguntei na Fundación non sabían nada sobre as orixes lucenses do Nobel. Logrei falar co seu irmán José Luis cando vivía en Santiago e foi moi atento comigo. Díxome que non sabía nada máis que a orixe en Piñor de Cea, polo que decidín buscar nos arquivos diocesanos de Ourense e atopei varios documentos, esencialmente a acta bautismal do avó de Camilo José Cela no que figuraba que seu pai era natural de Triacastela.

-¿Que sentiu cando confirmou a información?

-Despois de atopar eses documentos pensei que estaba todo feito, xa que o resto foi coser e cantar. De inmediato xa lle mostrei toda a documentación a José Luis. A verdade foi que cando encaixei todas as pezas deste puzle sentín unha enorme alegría por fixar as orixes dun premio Nobel en Triacastela.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Luis López Pombo: «Camilo José Cela nunca coñeceu a casa, aínda que o intentou»